Դավիթ Գալստյան
Դավիթ Վլադիմիրի Գալստյան (սեպտեմբերի 5, 1980, Ստեփանակերտ, Ադրբեջանական ԽՍՀ, ԽՍՀՄ), արցախցի քաղաքական գործիչ, Արցախի Հանրապետության Ազգային ժողովի պատգամավոր՝ Արցախի «Արդարություն» կուսակցությունից։
| Դավիթ Գալստյան | |
|---|---|
| Ծնվել է | սեպտեմբերի 5, 1980 (44 տարեկան) |
| Ծննդավայր | Ստեփանակերտ, Ադրբեջանական ԽՍՀ, ԽՍՀՄ |
| Մասնագիտություն | քաղաքական գործիչ |
Կենսագրություն
խմբագրելԴավիթ Գալստյանը ծնվել է Ստեփանակերտ քաղաքում, 1980 թվականի սեպտեմբերի 5-ին։ 1997 թվականին ավարտել է Ստեփանակերտ քաղաքի Հովհաննես Թումանյանի անվան թիվ 9 միջնակարգ դպրոցը։ 1998-2000 թվականներին ծառայել է Արցախի Հանրապետության Պաշտպանության բանակի հրետանային ստորաբաժանմունքում։ Ծառայության ընթացքում ստացել է սերժանտի կոչում։
2002 թվականին ավարտել է Երևանի «Մեսրոպ Մաշտոց» համալսարանի «Տնտեսագիտություն» ֆակուլտետի «Տնտեսագիտություն և ինֆորմատիկա» բաժինը և ստացել տնտեսագետ-ինֆորմատիկի որակավորոմ։
2002 թվականին նշանակվել է Արցախի Հանրապետության հարկային պետական վարչության պետ, որից հետո՝ հարկային տեսչության հաշվառման հաշվետվությունների գանձումների բաժնի ավագ հարկային տեսուչ, գլխավոր հարկային տեսուչ։
2005 թվականից եղել է եկամուտների պլանավորման ընթացիկ հաշվետվությունների գանձման բաժնի գլխավոր մասնագետ, 2011 թվականից՝ «Հայբիզնեսբանկ» ՓԲԸ կառավարիչ, այնուհետև՝ Ասկերանի մասնաճյուղի կառավարիչ։
Դավիթ Գալստյանը 2013 թվականին նշանակվել է «Հայբիզնեսբանկ» ՓԲԸ Ստեփանակերտի մասնաճյուղի կառավարիչ, մեկ տարի անց՝ «Հայբիզնեսբանկ» ՓԲԸ Տող գյուղի մասնաճյուղի կառավարիչ։ 2016-2020 թվականներին Դավիթ Գալստյանը զբաղեցրել է «Հայբիզնեսբանկ» ՓԲԸ Ստեփանակերտ քաղաքի մասնաճյուղի կառավարչի տեղակալի պաշտոնը։
2020 թվականի մարտի 31-ի խորհրդարանական ընտրություններում Արցախի «Արդարություն» կուսակցության համամասնական ցուցակով ընտրվել է Արցախի Հանրապետության 7-րդ գումարման Ազգային ժողովի պատգամավոր[1]։
Ամուսնացած է, ունի երեք զավակ։
Ծանոթագրություններ
խմբագրել- ↑ «ԳԱԼՍՏՅԱՆ ԴԱՎԻԹ ՎԼԱԴԻՄԻՐԻ». Արխիվացված է օրիգինալից 2023 թ․ օգոստոսի 15-ին. Վերցված է 2023 թ․ օգոստոսի 15-ին.