Արթուր Վաղարշյան
Արթուր Գրիշայի Վաղարշյան (հոկտեմբերի 7, 1963, Լճաշեն, Սևանի շրջան, Հայկական ԽՍՀ, ԽՍՀՄ), հայ իրավագետ, իրավաբանական գիտությունների դոկտոր, պրոֆեսոր[1], Երևանի պետական համալսարանի իրավագիտության ֆակուլտետի Պետության և իրավունքի տեսության ու պատմության ամբիոնի նախկին վարիչ, Հայաստանի Հանրապետության Սահմանադրական դատարանի անդամ։
| Արթուր Վաղարշյան | |
|---|---|
| Ծնվել է | հոկտեմբերի 7, 1963 (60 տարեկան) |
| Ծննդավայր | Լճաշեն, Սևանի շրջան, Հայկական ԽՍՀ, ԽՍՀՄ |
| Քաղաքացիություն |  Հայաստան |
| Ազգություն | հայ |
| Կրթություն | ԵՊՀ իրավաբանական ֆակուլտետ |
| Մասնագիտություն | իրավագետ |
| Աշխատավայր | Երևանի պետական համալսարան |
Կենսագրություն խմբագրել
Արթուր Գրիշայի Վաղարշյանը ծնվել է 1963 թվականի հոկտեմբերի 7-ին ՀԽՍՀ Սևանի շրջանի (ներկայիս Հայաստանի Հանրապետության Գեղարքունիքի մարզի) Լճաշեն գյուղում։ Նախնական կրթությունը ստացել է տեղի միջնակարգ դպրոցում, ապա՝ դպրոցը գերազանցությամբ ավարտելուց հետո ծառայության անցել Խորհրդային Միության Զինված ուժերի շարքերում։
Զինծառայության ավարտից հետո՝ 1984 թվականին, ընդունվել է Երևանի պետական համալսարանի իրավագիտության ֆակուլտետ, որն էլ ավարտել է 1989 թվականին։ Ըստ Արթուր Վաղարշյանի՝ իրավաբանի մասնագիտության ընտրությունը ի սկզբանե պայմանավորված է եղել այն հանգամանքով, որ հոկտեմբերի 7-ը (ծննդյան օրը) հանիսացել է ԽՍՀՄ 1977 թվականի Սահմանադրության ընդունման օրը, ինչն էլ, ինքնին, հետաքրքրություն է առաջացրել այդ գիտության նկատմամբ։ 1989-1992 թվականներին սովորել է ԵՊՀ իրավագիտության ֆակուլտետի ասպիրանտուրայում՝ պետության և իրավունքի տեսություն ու պատմություն, քաղաքական իրավական ուսմունքներ մասնագիտությամբ։
1996 թվականին պաշտպանել է «Հայաստանի առաջին Հանրապետության դատական համակարգը» թեմայով թեկնածուական ատենախոսությունը։ 2013 թվականին՝ դոկտորական ատենախոսությունը «Հայաստանի առաջին Հանրապետության պետական իշխանության համակարգը» թեմայով։ 1993-1994 թվականներին աշխատել է որպես ԵՊՀ իրավագիտության ֆակուլտետի քաղաքացիական իրավունքի ամբիոնի դասախոս, ապա՝ ԵՊՀ պետության և իրավունքի տեսության ու պատմության ամբիոնի ասիստենտ (մինչև 2002 թվականը)։ 2002-2005 թվականներին եղել է վերոնշյալ ամբիոնի դոցենտ, իսկ 2005 թվականից ցայսօր՝ ամբիոնի վարիչ։
Ծանոթագրություններ խմբագրել
- ↑ «Արթուր Գրիշայի Վաղարշյան». publishing.ysu.am. Վերցված է 2020 թ․ փետրվարի 12-ին.