Ակտիվ դիմադրություն

Ակտիվ դիմադրություն, փոփոխական հոսանքի շղթայի լրիվ դիմադրության էլեկտրական էներգիա կլանող մասը։ Ակտիվ դիմադրությունը P ակտիվ (կլանված) հզորության հարաբերությունն է I հոսանքի գործող արժեքի քառակուսուն՝

$R={\frac {P}{I}}^{2}$։ Հաղորդչի կտրվածքով փոփոխական հոսանքի անհամասեռ բաշխվածության (սկին էֆեկտ), մրրկային հոսանքների և հիստերեզիսի վրա ծախսվող էներգիայի պատճառով ակտիվ դիմադրությունը մեծ է հաստատուն հոսանքի դիմադրությունից։ Ակտիվ դիմադրությունը փոփոխական հոսանքի շղթայի դիմադրությունների եռանկյան էջն է։

Ակտիվ դիմադրությունը $g$ ակտիվ հաղորդականության հետ կապված է

$R=gZ$

առնչությամբ, ուր Z-ը շղթայի լրիվ դիմադրությունն է։

Իմպենդանսի հետ ակտիվ դիմադրությունը կապված է

$Z=R+jX$

առնչութւամբ, որտեղ $Z$-ը իմպեդանսն է (լրիվ դիմադրությունը), $R$-ը՝ ակտիվ դիմադրության մեծությունը, $X$-ը՝ ռեակտիվ դիմադրության մեծությունը, $j$-ն՝ կեղծ միավորը։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 1, էջ 231)։