Ազատ Ասոյան
Ազատ Արթուրի Ասոյան (1994 թ․ հուլիսի 26, Երևան – 2014 թ․ հուլիսի 31, ադրբեջանա – արցախյան հակամարտ ուժերի շփման գիծ), ՀՀ զինված ուժերի շարքային զինծառայող, ով զոհվել է Արցախի Հանրապետության առաջնագծում, ադրբեջանական կողմի դիվերսիոն խումբը հետ մղելիս։ Հետմահու պարգևատրվել է ՀՀ Մարտական ծառայության մեդալով։ Ազատ Ասոյանը Երևանի պետական համալսարանի Իրավաբանական ֆակուլտետի ուսանող էր, զորացրվելուց հետո պատրաստվում էր շարունակել ուսումը։ Նրա զորացրվելուն մնացել էր 10 օր։
| Ազատ Ասոյան | |
|---|---|
 | |
| Ծնվել է | հուլիսի 26, 1994 |
| Ծննդավայր | Երևան, Հայաստան |
| Մահացել է | հուլիսի 31, 2014 (20 տարեկան) |
| Մահվան վայր | Արցախ |
| Քաղաքացիություն |  Հայաստան |
| Պարգևներ և մրցանակներ |  |
Սխրանքը խմբագրել
Ազատ Ասոյանը հուլիսի 31-ին իր մարտական ընկերների հետ ԼՂՀ հյուսիսային հատվածում հակառակորդի կողմից ձեռնարկված դիվերսիոն գործողությունը հետ է մղել, որի արդյունքում զոհվել է հերոսական մահով, իսկ հակառակորդը կրել է բազմաթիվ կորուստներ և հետ շպրտվել ելման դիրքեր։ Ասոյանի հետ միասին դիվերսիոն գործողությունը հետ մղելիս զոհվել է նաև նրա ծառայակից ընկեր Արարատ Վաչիկի Խանոյանը։
Հուղարկավորություն խմբագրել
2014 թ. օգոստոսի 2-ին զինվորական կարգով Ազատ Ասոյանին հողին հանձնեցին Եռաբլուր զինվորական պանթեոնում։ Զինվորի հուղարկավորության արարողությանը ներկա էին տարբեր քաղաքական ուժերի ներկայացուցիչներ, ՀՀ պաշտպանության փոխնախարար Դավիթ Տոնոյանը։ Իսկ ՀՀ պաշտպանության նախարար Սեյրան Օհանյանը և ՀՀ վարչապետ Հովիկ Աբրահամյանը վերջին հրաժեշտը Ազատ Ասոյանին տվել են զինծառայողի հայրական տանը։
Պարգևներ խմբագրել
ՀՀ Նախագահի կողմից հետմահու պարգևատրվել է Մարտական ծառայության մեդալով[1]` «Հայրենիքի սահմանների պաշտպանության գործում ցուցաբերած անձնական խիզախության և նվիրումի, կյանքին սպառնացող վտանգի պայմաններում ծառայողական պարտքը անձնազոհաբար կատարելու համար»[2][3]։
Այլ տեղեկություններ խմբագրել
Ազատ Ասոյանը մասնակցել է 2009 թվականին կայացած Հայաստանի ձյուդոյի պատանեկան առաջնությանը, որի արդյունքում դարձել է 81 կգ քաշային խմբում Հայաստանի ձյուդոյի չեմպիոն[4]։