Վասիլի Վախտերով
Վասիլի Պորֆիրևիչ Վախտերով (Василий Порфирьевич Вахтеров, հունվարի 13 (25), 1853, Արզամաս, Նիժնի Նովգորոդի մարզ, Ռուսական կայսրություն[1] - ապրիլի 3, 1924[1], Մոսկվա, ԽՍՀՄ[1]), ռուս մանկավարժ, տարրական դպրոցի մեթոդիստ։ Բանվորական դպրոցների կազմակերպիչներից։ Սովորել է Արզամասի հոգևոր ուսումնարանում, ապա՝ Նիժեգորոդյան հոգևոր սեմինարիայում։ 1881–1896 թթ.-ին եղել է Սմոլենսկի գավառի, ապա՝ Մոսկվայի ժողովրդական ուսումնարանների տեսուչ։
Վասիլի Վախտերով Василий Вахтеров | |
---|---|
Ծնվել է | հունվարի 13 (25), 1853 Արզամաս, Նիժնի Նովգորոդի մարզ, Ռուսական կայսրություն[1] |
Մահացել է | ապրիլի 3, 1924[1] (71 տարեկան) Մոսկվա, ԽՍՀՄ[1] |
Քաղաքացիություն | Ռուսական կայսրություն, ԽՍՀՄ |
Մասնագիտություն | գիտնական |
Տիրապետում է լեզուներին | ռուսերեն |
1893-1903 թվականներին աշխատել է Մորոզովայի տվերյան մանուֆակտուրային կից դպրոցում։ 1903 թվականին ձերբակալվել է աշակերտության և բանվորության շրջանում հակակառավարական պրոպագանդա ծավալելու պատրվակով։ 1905-1907 թվականների հեղափոխության ժամանակ եռանդուն աշխատանք է տարել ուսուցչական միության ստեղծման համար, հետագայում մասնակցել է ուսուցչական մի շարք համագումարների։
Վախտերովը միշտ եղել է դեմոկրատական ուժերի շարքերում, բայց նրա դեմոկրատիզմը սահմանափակված է եղել լիբերալ նարոդնիկության գաղափարներով։ Նա չի հասկացել Հոկտեմբերյան սոցիալիստական մեծ հեղափոխության համաշխարհային պատմության նշանակությունը և սկզբնական շրջանում հրաժարվել է մասնակցել ժողովրդական կրթության վերակառուցման միջոցառումներին։ Հետագայում դասավանդել է անգրագիտության վերացման, ուսուցիչների պատրաստման կուրսերում, իսկ 1923-1924 թվականներին՝ Մոսկվայի թիվ 2 համալսարանում։
Մանկավարժության մեջ Վախտերովը զարգացրել է Ուշինսկու գաղափարները, ներդրում ունի տարրական ուսուցման տեսության և պրակտիկայի գործում («Ռուսական այբբենարանը», 1898 թվական, «Աշխարհը մանկական պատմվածքներում», 1902 թվական, «Ուսուցման առարկայական մեթոդ», 1907 թվական, «Նոր մանկավարժության հիմունքներ», 1913 թվական, «Համաժողովրդական դպրոց և արտադրություն», 1917 թվական)։
Ծանոթագրություններ խմբագրել
- ↑ 1,0 1,1 1,2 1,3 1,4 1,5 1,6 1,7 1,8 Вахтеров Василий Порфирьевич // Большая советская энциклопедия (ռուս.): [в 30 т.] / под ред. А. М. Прохоров — 3-е изд. — М.: Советская энциклопедия, 1969.
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 11, էջ 239)։ |