Հովհաննես Ավոյան

Հովհաննես Բագրատի Ավոյան (1903, Էջմիածին -), հայ բժիշկ, մանկավարժ, Հայրենական մեծ պատերազմի մասնակից։

Հովհաննես Բագրատի Ավոյան
Ծնվել է	1903
Ծննդավայր	Էջմիածին
Քաղաքացիություն	Հայկական ԽՍՀ
Ազգություն	հայ
Կրթություն	Երևանի բժշկական ինստիտուտ
Մասնագիտություն	բժիշկ

Կենսագրություն

Միջնակարգ կրթությունն ստացել է ծննդավայրում։ 1924-1931 թվականներին եղել է ուսուցիչ, ապա դպրոցի տնօրեն շրջանի մի քանի գյուղերում։ 1936 թվականին ավարտել է Երևանի բժշկական ինստիտուտը։ Եղել է ենթաշրջանի բուժտեղամասի վարիչ Ազիզբեկովի շրջանում (1936-1938), գլխավոր բժիշկ՝ Սևանի հիվանդանոցում (1938-1939), օրդինատոր՝ Երևանի մանկաբարձագինեկոլոգիական ինստիտուտում (1939-1941)։

1941 թվականի հունիսին զորակոչվել է բանակ, նշանակվել էվակուհոսպիտալի վիրաբույժ-օրդինատոր, մի քանի ամիս հետո տեղափոխվել է մի այլ էվակուհոսպիտալ։ 1942 թվականին մեկնել է գործող բանակ։ Ծառայել է 151-րդ դիվիզիայի № 228 բուժսանգումարտակում որպես վիրաբույժ (4-րդ Ուկրաինական ռազմաճակատ)։ 1944 թվականի սեպտեմբերին հիվանդացել է, ուղարկվել Երևանի կայազորային հոսպիտալ՝ բուժվելու։ Զորացրվել է (1946) և կրկին աշխատանքի ընդունվել Երևանի մանկաբարձագինեկոլոգիական ինստիտուտում։ 1947 թվականին նշանակվել է Երևանի 4-րդ ծննդատան գլխավոր բժիշկ և աշխատել մինչև 1956 թվականը։ Այնուհետև եղել է կանանց կոնսուլտացիայի վարիչ (1957-1960), 5-րդ ծննդատան բաժնի վարիչ (1965-1980)։

Հովհաննես Ավոյանը վաստակավոր բժիշկ է, առողջապահության գերազանցիկ, շքանշանների ու մեդալների ասպետ։