ՀՀ դատական դպրոց
Հայաստանի Հանրապետության դատական դպրոց, ՀՀ ԴԴ, ՀՀ դատարանների նախագահների խորհրդի կողմից հիմնված շահույթ ստանալու նպատակ չհետապնդող պետական ոչ առևտրային կազմակերպություն, որը իրականացնում է Հայաստանի Հանրապետության դատավորների վերապատրաստման, ինչպես նաև ՀՀ դատավորների թեկնածությունների ցուցակում ընդգրկված անձանց պատրաստման դասընթացներ[1]։
Իրավական հիմունքներ խմբագրել
Դատական դպրոցի գործունեությունը կարգավորվում է ՀՀ դատական օրենսգրքով և Դատական դպրոցի կանոնադրությամբ, ինչպես նաև «Պետական ոչ առևտրային կազմակերպությունների մասին» ՀՀ օրենքով այնքանով, որքանով այն իր էությամբ կիրառելի է ՀՀ դատական դպրոցի նկատմամբ և չի հակասում ՀՀ դատական օրենսգրքին։ Հատկանշական է, որ «Կրթության մասին» ՀՀ օրենքի պահանջները ՀՀ դատական դպրոցի վրա չեն տարածվում[1]։
Պատմություն խմբագրել
Հայաստանի դատական դպրոցը հիմնադրվել է Հայաստանի կողմից՝ ի դեմս Հայաստանի դատարանների նախագահների խորհրդի։ 2007 թվականին տեղի ունեցավ դպրոցի առաջին ընդունելությունը, որի արդյունքում Հայաստանի Նախագահ Ռոբերտ Քոչարյանը հաստատեց դատավորների թեկնածուների ցուցակը։ Առաջին ունկնդիրները դպրոցն ավարտեցին 2008 թվականի օգոստոսին[1]։
Գործառույթներ խմբագրել
ՀՀ դատական դպրոցի գործառույթներն են[1]՝
- կազմակերպել դատավորների թեկնածությունների ցուցակի կազմման նպատակով անցկացվող որակավորման ստուգումը,
- կազմակերպել որակավորման ստուգման արդյունքներով դատավորների թեկնածությունների ցուցակում ընդգրկված անձանց մասնագիտական պատրաստումը,
- կազմակերպել և անցկացնել է ՀՀ դատական դպրոցն ավարտածների, պաշտոնեական պիտանիության և առաջխաղացման ցուցակում ընդգրկված անձանց[2] վերապատրաստումը,
- կազմակերպել և անցկացնել է դատական ծառայողների մասնագիտական վերապատրաստումը,
- կազմակերպել և անցկացնել է իրավական համակարգի, օրենսդրության և արդարադատության իրականացման կատարելագործմանն ուղղված սեմինարներ, գիտաժողովներ, հրատարակում է ուսումնական գրականություն և այլն,
- իրականացնել ՀՀ դատական դպրոցի ուսումնական ծրագրերի մշակումներ,
- իրականացնել կանոնադրությամբ նախատեսված այլ գործունեություն։
Դպրոցը տնօրենը նշանակվում է դպրոցի կառավարման խորհրդի կողմից՝ 5 տարի ժամկետով[1]։
Կառավարման մարմիններ խմբագրել
ՀՀ դատական դպրոցի կառավարումն իրականացնում են կառավարման խորհուրդը և տնօրենը։ Դատական դպրոցի կառավարման խորհուրդն իրականացնում է Դատական դպրոցի ընդհանուր կառավարումը և ընթացիկ գործունեության վերահսկողությունը[1]։
Դատական դպրոցի կառավարման խորհրդի անդամ են[1]`
- ՀՀ արդարադատության նախարարի կողմից նշանակվող մեկ անձ,
- ՀՀ վճռաբեկ դատարանի նախագահի կողմից նշանակվող մեկ անձ,
- ՀՀ դատարանների նախագահների խորհրդի ուսումնական հարցերով հանձնաժողովի բոլոր անդամները։
Ունկընդիրներ խմբագրել
Դատական դպրոցում ուսուցումը սկսվում է որակավորման ստուգման արդյունքների ամփոփումից հետո՝ հունվարին, և ավարտվում է նույն տարվա հուլիսի 31-ից ոչ ուշ։ Դատական դպրոցի ունկնդիր են դատավորների թեկնածությունների ցուցակում ընդգրկված անձինք (ՀՀ Դատական օրենսգրքի 117-րդ և 118-րդ հոդվածներին համապատասխան)։ Դատական դպրոցում ուսման ավարտմանը հաջորդող ամսվա մեկից Դատական դպրոցն ավարտածները պարտադիր ներգրավվում են աշխատանքի ՀՀ դատական դեպարտամենտի կենտրոնական մարմնում[1]։
Դպրոցը պարբերաբար նաև կազմակերպում և անցկացնում է վերապատրաստման դասընթացներ, որոնք պարտադիր են դատավորների և դատավորների թեկնածությունների ցուցակում ընդգրկված բոլոր անձանց համար[1]։