Լեգիրացված պողպատ

Լեգիրացված պողպատ, պողպատ, որը բացի սովորական խառնուկներից (ածխածին, սիլիցիում, մանգան, ծծումբ, ֆոսֆոր), պարունակում է նաև լեգիրող տարրեր (քրոմ, նիկել, մոլիբդեն, վոլֆրամ, վանադիում, մանգան, տիտան), որոնք լավացնում են մետաղի շահագործման և տեխնոլոգիական հատկությունները։ Լեգիրող տարրերը հալված մետաղի մեջ մտցվում են ֆեռոհամաձուլվածքների կամ Լիգատուրայի ձևով։ Մինչև 2,5% լեգիրող տարրեր պարունակող պողպատը համարվում է ցածր լեգիրված, 2,5% –10%՝ միջին լեգիրված, 10%-ից բարձր՝ բարձր լեգիրված։ Պողպատը կարող է լեգիրված լինել մեկ, երկու, երեք և ավելի տարրերով։ Համապատասխանաբար լեգիրացված պողպատ կոչվում են քրոմային, քրոմնիկելային, քրոմնիկելմոլիբդենային ևն։ Լեգիրացված պողպատները մակնիշավորվում են ըստ իրենց քիմիական բաղադրության։

Տես նաև

• Լեգիրում

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 4, էջ 512)։