Արթուր Ղազինյան

Արթուր Գագիկի Ղազինյան (նոյեմբերի 10, 1978(1978-11-10), Երևան, Հայկական ԽՍՀ, ԽՍՀՄ), հայ իրավաբան, «Մեկ Հայաստան» կուսակցության հիմնադիր նախագահ, իրավաբանական գիտությունների թեկնածու, դոցենտ։

Արթուր Ղազինյան
Ծնվել է	նոյեմբերի 10, 1978(1978-11-10) (45 տարեկան)
Ծննդավայր	Երևան, Հայկական ԽՍՀ, ԽՍՀՄ
Զբաղեցրած պաշտոններ	Հայաստանի Ազգային ժողովի պատգամավոր

Կրթություն և գիտական գործունեություն

2001 թվականին ավարտել է ԵՊՀ իրավաբանական ֆակուլտետի մագիստրատուրան, 2004 թվականին ԵՊՀ Սահմանադրական իրավունքի ասպիրանտուրան։ 2004 թվականին պաշտպանել է«Մարդու իրավունքների եվրոպական դատական պաշտպանությունը» վերտառությամբ թեկնածուական ատենախոսություն։ 2009 թվականին ստացել է ԵՊՀ դոցենտի կոչում։

Հեղինակել է երկու մենագրություն, երկու տասնյակից ավելի գիտական հոդված։

Աշխատանքային գործունեություն

1999-2002 թվականներին եղել է Հայաստանի Սահմանադրական դատարանի աշխատակազմում, 2002-2004 թվականներին՝ ՀՀ քաղաքացիական ծառայության խորհրդի արտաքին կապերի վարչության պետ. մասնակցել է ՀՀ քաղաքացիական ծառայության համակարգի ներդրման ու կայացման գործընթացին, համակարգել Քաղաքացիական ծառայության խորհրդի համագործակցությունը երրորդ պետությունների և միջազգային կազմակերպությունների հետ։

2004-2008 թվականներին եղել է ՀՀ Կառավարության աշխատակազմում, ՀՀ տարածքային կառավարման նախարարի խորհրդական. համակարգել է համայնքային ծառայության մասին ՀՀ օրենքի մշակման աշխատանքները և Համայնքային ծառայության համակարգի պրակտիկ ներդրումը ՀՀ համայնքներում, ՀՀ Տարածքային կառավարման նախարարության համագործակցությունը երրորդ պետությունների և միջազգային կազմակերպությունների հետ, համայնքային կառավարման տեղեկատվական համակարգի մշակման և ներդրման աշխատանքները։

2009-2010 թվականներին եղել է ՀՀ Ազգային ժողովի նախագահի խորհրդական. ՀՀ ԱԺ նախագահի հանձնարարությամբ մասնակցել է ՀՀ ԱԺ արտաքին հարաբերությունների և միջազգային կապերի ընդլայնման և արդյունավետության բարձրացման աշխատանքներին, համակարգել է «կարգավորմ անազդեցության գնահատման» և «արդար ու արդյունավետ կառավարման» համակարգերի մշակման աշխատանքները։

2006 թվականից ԵՊՀ և ԵՄ պատվիրակության օժանդակությամբ հիմնադրել և ղեկավարում է ԵՊՀ եվրոպական ուսումնասիրությունների կենտրոնը։ Կազմակերպել և ղեկավարել է միջառարկայական կրթության և գիտության նորարարական մոդելի ՀՀ կրթական համակարգում ներդրման աշխատանքները։ ՀՀ Կառավարության որոշմամբ «եվրոպագիտություն» մասնագիտությունը ներառվել է մագիստրոսական մասնագիտությունների ցանկում։ Եվրոպական ուսումնասիրությունների կենտրոնում հիմնադրել և ղեկավարում է «Եվրոպագիտություն» միջմասնագիտական մագիստրոսական ծրագիրը։ 2010 թվականից հիմնադրել և ԵՄ աջակցությամբ ղեկավարում է «Մարդու իրավունքներ և ժողովրդավարացում» տարածաշրջանային մագիստրոսական ծրագիրը։

Արտաքին հղումներ

• Արթուր Ղազինյան - Հայաստան դաշինք(չաշխատող հղում)