«Սևոլ» լաստանավի աղետ

«Սևոլ» լաստանավի աղետ
	«Սևոլ» լաստանավի խորտակման լուսանկարը Հարավային Կորեայի ծովային ոստիկանության վարչության կողմից
Թվական	2014-4-16 (10 տարի առաջ)
Ժամանակ	Տեղական ժամանակով 09:00-ից 11:30
Վայր	Դոնգեչադո, Հարավային Ջոլա, Հարավային Կորեա
Պատճառ	Նավը թեքվել և խորտակվել է
Մահ(եր)	304
Անհայտ կորածներ	9

Հարավկորեական «Սևոլ» լաստանավի աղետ (կորեերեն՝ 세월, անգլ.՝ Sewol), լաստանավի խորտակում, որը տեղի է ունեցել 2014 թվականի ապրիլի 16-ին՝ Կորեական թերակղզու հարավ-արևմտյան ափին։ Լաստանավը ընթանում էր իր կանոնավոր ճանապարհով՝ Ինչոնից Ջեջու։ Նավը թեքվել և խորտակվել է։ Մահացել է 304 մարդ։

Աղետ

2012 թվականին «Chonghaejin Marine» ընկերությունը գնեց նավը, որը ստացավ «MV Sewol» անվանումը։ Այն 18 տարեկան էր և արդեն հին էր։ 1994-2012 թվականներից այն օգտագործել է ճապոնական «A-Line Ferry» ընկերությունը՝ բեռների և ուղևորների տեղափոխման համար։ Ուղևորների համար ավելացվել էր երկու տախտակամած և ընդլայնվել էր բեռների տարածքը։ Նախկին 116-ի փոխարեն նավը կարող էր տեղափոխել 956 անձ՝ ներառյալ անձնակազմը։

Սևոլը սկսել է իր գործունեությունը 2013 թվականի մարտի 15-ին։ Այն շաբաթական երեք անգամ Ինչոնից Ջեջու ճանապարհ էր անցնում, որը տևում էր 13,5 ժամ և 425 կմ։

Աղետի օրը լաստանավի վրա գտնվել է անձնակազմի 33 անդամ և 443 ուղևոր, որից 325-ը Անսան քաղաքի Դանվոն ավագ դպրոցի ուսուցիչներ և աշակերտներ էին։ Աշակերտները շջանավարտներ էին, ովքեր իրենց վերջին դպրոցական ամառային արձակուրդներին ճանապարհորդում էին Ջեջու կղզի։ Լաստանավը նաև 2142 տոննա բեռներ էր տեղափոխում, ներառյալ 185 ավտոմեքենաներ։

2014 թվականի ապրիլի 16-ին, տեղական ժամանակով 09:00-ին, Դոնգեչադոյից 20 կիլոմետր հեռավորության վրա, լաստանավից ուղարկվել է SOS ազդանշանը։ Դեպքի վայր են ուղարկվում Կորեայի առափնյա պահպանության նավերը, ռազմածովային ուժերի նավեր և ուղղաթիռներ։

Խորտակվող նավի առաջին ժամերին հայտնաբերվում է անձնակազմի անդամ, 27-ամյա կնոջ դի, իսկ ավագ դպրոցի աշակերտներից մեկը մահացել էր անհետաձգելի օգնության բաժին գնալուց հետո։

Աղետի հետևանքով մահացել է 304 մարդ, որից 9-ը համարվում են անհետ կորած^[1]։ 304-ից 250-ը Դանվոն ավագ դպրոցի աշակերտներն էին։ 172 փրկվածների կեսը ողջ է մնացել ձկնորսական նավակների և այլ առևտրային նավերի միջոցով, որոնք դեպքի վայր են ժամանել Կորեայի առափնյա պահպանության ժամանումից 40 րոպե անց։ Եվս երեք անձ զոհվել է որոնողական աշխատանքների ընթացքում։ Նրանք ստորջրյա աշխատանքների մասնագետներ էին՝ երկու քաղաքացիական ջրասուզակներ և Հարավային Կորեայի ռազմածովային ուժերի մեկ զինծայող^[2]։

«Սևոլ» լաստանավի խորտակումը հասարակական լայն արձագանք է առաջացրել Հարավային Կորեայում։ Շատերը քննադատում էին կապիտանի, անձնակազմի, լաստանավի օպերատորի և կարգավորիչների գործողությունները։

2017 թվականի մարտի 22-ից 25-ը իրականացվել է լաստանավի բարձրացման գործողությունը^[3]^[4]։

Հետաքննություն

Աղետից հետո, դատարանի որոշմամբ, ձերբակալվել են նավի կապիտան, 68-ամյա Լի Չոն Սոկը և նրա օգնականները^[5]։ Հետաքննության ընթացքում պարզ դարձավ, որ պատահարի ընթացքում լաստանավի ղեկավարությամբ զբաղվել է 25-ամյա անփորձ կին շտուրման, որն այդ գծում աշխատում էր ընդամենը հինգ ամիս, իսկ նավատորմ էր եկել ընդամենը մեկ տարի առաջ։ Նախնական տվյալներով՝ չափազանց կտրուկ շրջադարձ է կատարվել, որն ուժեղ կողաթեքում է առաջացրել և բեռը սկսվել է տեղաշարժվել։ Նավը չի կարողացել կարգավորվել, թեքվել է կողքի վրա և վերջնական շրջվել է^[6]։

Կապիտանը առաջիններից էր, որը լքել է լաստանավը։ Ուղևորները պնդում են, որ կապիտանը չի կարողացել ժամանակին գնահատել կատարվածի վտանգը և շատ ուշ է հայտարարել տարհանման մասին^[5]։ Հարավային Կորեայի նախագահը քննադատաբար է մոտեցել խորտակված լաստանավի կապիտանի և «անձնակազմի որոշ անդամների» գործողություններին․

Կապիտանի և անձնակազմի որոշ անդամների պահվածքը ողջամտության տեսանկյունից անհասկանալի է, և այն նման է սպանության, որը հնարավոր չէ հանդուրժել։

- Փակ Կըն Հյե^[7]

Ապրիլի 22-ին լաստանավի վթարի պատճառի նոր վարկած է առաջ քաշվել։ Հարավային Կորեայի ծովային գործերի և ձկնորսության նախարարության ներկայացուցիչների խոսքով, նավի ուղղության ավտոմատ տեղորոշման համակարգի տվյալների վերլուծությունը նոր պատկեր է ցույց տվել տեղի ունեցածի վերաբերյալ։ Ըստ նոր տարբերակի, իրավիճակը զարգացել է նմանատիպ սցենարով՝ շրջադարձ, բեռների տեղաշարժ, կողաթեքում և խորտակում, սակայն այժմ կորեացի փորձագետները սկսում են մտածել, որ մարդկային սխալի գործոնը չի եղել աղետի հիմնական պատճառը։ Պարզվում է, որ չափազանց կտրուկ շրջադարձ չի էլ եղել։ Այս առումով ավելի ուշադրությամբ ուսումնասիրվում է նավի տեխնիկական համակարգերի անսարքության մասին վարկածը^[8]։

Նոյեմբերի 11-ին, Կվանգջու քաղաքի դատարանը լաստանավի կապիտանին դատապարտել է 36 տարվա ազատազրկման, չնայած նրան, որ հնարավոր էր Լիին մահապատժի դատապարտել։ Անձնակազմի մնացած 14 անդամները, ովքեր պատասխանատու էին նավագնացության և լաստանավի անվտանգության համար, դատապարտվել են 5-ից 30 տարվա ազատազրկմամբ^[9]։ Դատավճռից երկու օր անց անձնակազմի ութ անդամներ, ներառյալ լաստանավի կապիտանը, վերաքննիչ բողոք են ներկայացնում՝ պահանջելով կասեցնել դատավճիռը և վերանայել գործը։ Լի Չոն Սոկը պահանջել է կրճատել պատժաչափը՝ իր տարիքի պատճառով։

2015 թվականի ապրիլի 28-ին Հարավային Կորեայի վերաքննիչ դատարանը կասեցրեց Կվանգջու քաղաքային դատարանի որոշումը՝ կապիտան Լի Չոն Սոկին մեղավոր ճանաչելով զանգվածային սպանության մեջ և դատապարտելով ցմահ ազատազրկման։

Ծանոթագրություններ

[1] «Власти Южной Кореи прекратили поиски пропавших при крушении «Севоль»». ՌԻԱ Նովոստի. 11.11.2014.

[2] «Во время поиска тел на пароме «Севоль» погиб уже третий водолаз». rbc.ru. 30.05.2014.

[3] В Корее начали подъём парома «Севоль»

[4] В Корее завершили подъём парома «Севоль»

[captain-5] 5,0 ^5,1 Капитан затонувшего парома в Южной Корее арестован.

[6] Корея шокирована трагедией с крушением судна.

[7] Экипаж судна «Севоль» задержали по подозрению в халатности // Взгляд, 21-04-2014

[8] Основная версия крушения «Севоля» поставлена под сомнение // РГ

[9] Капитан парома «Севоль» избежал смертной казни // Лента.ру

[1]

[2]

[3]

[4]

[5]

[6]

[7]

[8]

[9]