Պարամագնիսականություն
Պարամագնիսականություն կամ մագնիսականություն, արտաքին մագնիսական դաշտի ուղղությամբ մարմինների մագնիսացման հատկությունն է։ «Պարամագնիսականություն» տերմինը 1845 թվականին ներմուծել է Մայքլ Ֆարադեյը։ Պարամագնիսականուտթյանը բնորոշ է սեփական մագնիսական մոմենտ ունեցող մասնիկներ՝ ատոմներ, մոլեկուլներ, իոններ և միջուկներ պարունակող նյութերին, որոնք կոչվում են պարամագնիսական նյութեր և բնութագրվում են՝ դրական, մագնիսական ընկալունակությամբ։ Մագնիսական դաշտի բացակայությամբ մագնիսական մոմենտ ունեցող մասնիկների տարրական, մագնիսակա մոմենտների, քաոսային ջերմային շարժման հետևանքով պարամագնիսների մագնիսացումը հավասար է զրոյի։ Արտաքին, մագնիսական դաշտի ազդեցությամբ՝ տարրական մագնիսական մոմենտները, ի տարբերություն դիամագնիսականության, կողմնորոշվում են դաշտի ուղղությամբ, և պարամագնիսական նյութը մագնիսանում է։ Թույլ մագնիսական դաշտերում, երբ դաշտով պայմանավորված էներգիան շատ ավելի փոքր է մասնիկների ջերմային շարժման միջին էներգիայից դիտվում է I մագնիսացման աճ՝ մագնիսական դաշտի Н լարվածության մեծացմանը զուգընթաց։ Այստեղ մագնիսական ընկալունակությունն անկախ է դաշտի լարվածությունից, սակայն նվազում ջերմաստիճանի աճի հետ Կյուրիի օրենքով։ Կյուրիի օրենքին են ենթարկվում այն պարամագնիսները, որոնց բնորոշ է թույլ փոխազդեցությունը մագնիսական մոմենտ ունեցող մասնիկների միջև։ Ուժեղ մագնիսական դաշտերում և ցածր ջերմաստիճանների տիրույթում, երբ մագնիսական դաշտը լիովին ճնշում է ջերմային շարժման ապակողմնորոշող ազդեցությունը, և նյութում հաստատվում է մագնիսական հագեցում։ Այս դեպքում մագնիսական ընկալունակության ջերմաստիճանային վարքը նկարագրվում է Կյուրի-Վեյսի օրենքով։ Այս օրենքին են ենթարկվում օրինակ՝ անցումային խմբի և հազվագյուտ հողերի տարրերը։ Մետաղների պարամագնիսականությունը պայմանավորված է հիմնականում ազատ էլեկտրոնների և բյուրեղային ցանցի ատոմների իոնների էլեկտրոնային թաղանթների մագնիսական մոմենտներով։ Զուտ հաղորդականության էլեկտրոնների ներդրումն անկախ է ջերմաստիճանից, դա ակնհայտ է ալկալիական և հողալկալիական մետաղներում, որոնցում մագնիսական մոմենտ ունեն միայն ազատ էլեկտրոնները։ Ֆիզիկայում, պարամագնիսական նյութերն օգտագործվում են գերցածր ջերմաստիճանների ստացման համար։
Արտաքին հղումներ խմբագրել
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից։ 
|