Հմայակ Քեշիշյան
Հմայակ Խաչերի Քեշիշյան (1887, Մարաշ, Մարաշի գավառ, Հալեպի նահանգ, Օսմանյան կայսրություն- 1915, Քելլիկ գյուղի մոտ, Կարսի շրջան), հայ բժիշկ։
Ծնվել է | 1887 |
---|---|
Ծննդավայր | Մարաշ, Մարաշի գավառ, Հալեպի նահանգ, Օսմանյան կայսրություն |
Մահացել է | 1915 |
Մահվան վայր | Քելլիկ գյուղի մոտ, Կարսի շրջան |
Մահվան պատճառ | Հայոց ցեղասպանություն |
Ազգություն | հայ |
Կրթություն | Այնթապի Կենտրոնական Թուրքիայի քոլեջ |
Մասնագիտություն | բժիշկ |
Կոչում | հարյուրապետ |
Ծնողներ | Խաչեր Քեշիշյան |
Կենսագրություն խմբագրել
Ծնվել է 1887 թվականին Օսմանյան կայսրության Հալեպի նահանգի Մարաշի գավառի կենտրոն Մարաշ քաղաքում։ Դեղագործ-բժիշկ Խաչեր Քեշիշյանի կրտսեր որդին է։ Նախնական կրթությունն ստացել է ծննդավայրի թաղային վարժարանում, միջնակարգը՝ ամերիկացի միսիոներների Մարաշի «Ակադեմի» բարձրագույն վարժարանում։ 1909 թվականին ավարտել է ամերիկացի միսիոներների Այնթապի Կենտրոնական Թուրքիայի քոլեջը։ 1909 թվականին մեկնել է Կ. Պոլիս` բարձրագույն կրթություն ստանալու։ 1915 թվականին ավարտել է Կ. Պոլսի Օսմանյան համալսարանի բժշկական բաժինը։
1915 թվականին՝ Առաջին համաշխարհային պատերազմի ժամանակ զորակոչվել է օսմանյան բանակ և ուղարկվել 4-րդ զորաբանակում ծառայելու զինվորական բժիշկ՝ հարյուրապետի աստիճանով։ 1915 թվականին Կարսի շրջանի Քելլիկ գյուղի մոտերքը, վերևից եկած հրամանի համաձայն, սպանվել է իթթիհադական ազգայնամոլ իր իսկ հրամանատարի հրամանով կամ նրա իսկ արձակած գնդակից՝ 28 տարեկանում։ Այդ ժամանակ թուրք սպաները ևս 18 հայ զինվորական բժիշկների են գնդակահարել։
Գրականություն խմբագրել
- Հայ բժշկութեան տուած զոհերը, ցուցակագրուած վաւերական փաստերով, Կ. Պոլիս, 1919։
- Գալուստեան Գրիգոր Հ., Մարաշ, Նիւ Եորք, 1934։
- Մեզպուրեան Արթօ, Հայ եւ ծագումով հայ բժիշկներ։ Այբուբենական համառօտ անուանացանկ (16881940), Իսթանպուլ, 1940։
- Կարոյեան Գասպար, Մեծ Եղեռնի նահատակ հայ բժիշկները (անոնց պատգամները), Պոսթոն, 1957։
- Յուշամատեան Մեծ Եղեռնի (1915-1965), պատրաստեց Գերսամ Ահարոնեան, Պէյրութ, 1965։
- Թէոդիկ, Յուշարձան նահատակ մտաւորականութեան, Բ. տպագրութիւն, Երեւան, ապրիլ 24, 1985։
- Գալուստեան Գրիգոր Հ., Մարաշ կամ Գերմանիկ եւ հերոս Զէյթուն, Նիւ Եորք, 1988։
- Յարման Արսեն, Հայերը օսմանյան առողջապահության ծառայության մեջ և պատմություն սուրբ Փրկիչ հայոց հիվանդանոցի (թուրքերեն), Ստամբուլ, 2001։
Աղբյուր խմբագրել
Հարություն Մինասյան, Օսմանյան կայսրությունում և Թուրքիայի Հանրապետությունում բռնաճնշումների և ցեղասպանության ենթարկված հայ բժիշկներ, Երևան, «Լուսաբաց», 2014 — 520 էջ։