Ֆրիտ Ֆլակ

Ֆրրիտ Ֆլակ (ֆր. Frritt-Flacc), ֆրանսիացի գրող Ժյուլ Վեռնի սարսափ պատմվածքը, որը մտնում է «Անսովոր ճանապարհորդություններ» շարքի մեջ։ Վեպը գրվել է 1884 թվականին։ Պատմվածքի առաջին հրատարակությունը, որը բաղկացած էր 7 գլուխներից, կայացել է 1884 թվականի դեկտեմբերին Փարիզի «Le Figaro illustré» թերթում։ 1885 թվականի հուլիսի 10-ին հեղինակը ընթերցում էր իր պատմվածքը Ամյենի համալսարանում։ 1886 թվականի նոյեմբերի 4-ին, որոշ փոփոխությունների ենթարկված պատմվածքը, տպագրվում է «Վիճակախաղի տոմս № 9672» վեպի առաջին հրատարակության հետ միասին միևնույն հատորում։ 1886 թվականի նոյեմբերի 11-ին պատմվածքը՝ «Վիճակախաղի տոմս № 9672» և «Ռոբուր նվաճողը» վեպերի հետ միասին, հրատարակվում է «Անսովոր ճանապարհորդություններ»-ի քսանմեկերորդ «երկակի» հատորում։ Պատմվածքը պարունակում էր Ժորժ Ռուի երեք նկարազարդումներ։ Այնուհետև պատմվածքը նորից մշակվում է հեղինակի կողմից և 1886 թվականի դեկտեմբերին պատմվածքի վերջնական տարբերակը հրատարակվում է Պիեռ Ժյուլ Էտցելի «Magasin d’Éducation et de Récréation» ամսագրում։

Ֆրիտ Ֆլակ ֆր.՝ Frritt-Flacc
Հեղինակ	Ժյուլ Վեռն
Տեսակ	գրական ստեղծագործություն
Ժանր	սյաոշո
Բնօրինակ լեզու	ֆրանսերեն
Ստեղծման տարեթիվ	1884
Շարք	Անսովոր ճանապարհորդություններ
Հաջորդ	Ռոբուր նվաճողը
Նկարազարդող	Ժորժ Ռու
Երկիր	Ֆրանսիա
Հրատարակված է	Վիճակախաղի տոմս № 9672
Հրատարակման տարեթիվ	1886
Frritt-Flacc Վիքիպահեստում

Սյուժե

Ոչ մեծ, մտացածին Լուկտոպ ափամերձ քաղաքում, ապրում է բժիշկ Տրիֆուլգասը։ Նա հարուստ է և աշխատում է միայն հարուստների համար։ Նրա տան դռները փակ են աղքատների համար և միշտ բացվում են հարուստ հաճախորդների առջև, որոնք ի վիճակի են վճարել բժշկի մատուցած ծառայությունների դիմաց, քանի որ բժշկի համար կարևոր նշանակություն ունի միայն դրամը։

Մի անձրևոտ և փոթորկալից գիշեր լսվում է Տրիֆուլգասի տան դռան թակոցը։ Բժիշկը չկամենալով բացում է դուռը և դռան առջև տեսնում է մի աղջկա։ Նա աղքատ ձկնորս Վորտ Կարդիֆի դուստրն է։ Նրա հայրը մահամերձ է և աղջիկը եկել է խնդրելու բժշկի բարի ծառայությունները։ Սակայն աղջիկը գումար չունի և բժիշկը մերժում է նրան և գնում է շարունակելու իր քունը։

Որոշ ժամանակ անց նորից լսվում է դռան թակոցի ձայնը։ Այս անգամ դռան առջև կանգնած է մահամերձ ձկնորսի կինը։ Նա ունի որոշ խնայողություններ, սակայն բժիշկը դա համարում է անբավարար գումար և նորից մերժում է։ Նա կրկին վերադառնում է անկողին։

Փոթորիկը ավելի է ուժգնանում։ Նորից ինչ-որ մեկը թակում է բժիշկ Տրիֆուլգասի դուռը։ Այս անգամ բժշկի դռան առջև կանգնած է մահամերձ ձկնորսի մայրը։ Ձկնորսը կաթվածահար է եղել և անհրաժեշտ է բժշկի շտապ միջամտությունը։ Ձկնորսի մայրը վաճառել է տունը և ունի բավականին գումար, որպեսզի կարողանա վճարել բժշկին՝ նրա մատուցած ծառայությունների դիմաց։ Բժիշկը դժվարությամբ համաձայնում է և բռնում ձկնորսի տան ճանապարհը։

Ճանապարհին ձկնորսի մայրը անհետանում է, սակայն բժիշկը գիտի հասցեն և շարունակում է ճանապարհը։ Ժամանելով ըստ հասցեի, բժիշկը ճանաչում է իր սեփական տունը։ Նա մտնում է սենյակ, որտեղ պառկած է մահամերձ ձկնորսը։ Դա իր՝ բժշկի սենյակն է։ Նա մոտենում է մահամերձի անկողնուն։ Դա իր անկողինն է։ Նա դողացող ձեռքերով բացում է անկողնու վարագույրը։ Այնտեղ պառկած է ձկնորսը, որը անշարժ է և դեմքը ծածկված չէ։ Բժիշկ Տրիֆուլգասը խոնարհվում է ձկնորսի վրա և լսվում է մի ճիչ։ Բժիշկը ճանաչում է ինքն իրեն։ Նա հասկանում է, որ դա ինքն է անկողնում պառկած մարտնչում մահվան դեմ։

Բժիշկը փորձում է ամեն կերպ օգնել հիվանդին, սակայն այդ ամենը արդյունք չի տալիս։ Հիվանդը մահանում է։ Բժիշկ Տրիֆուլգասը մահանում է ինքն իր ձեռքերի վրա։

Բովանդակություն

Պատմվածքը բաղկացած է յոթ գլուխներից։

Կերպարներ

• Բժիշկ Տրիֆուլգաս
• Ձկնորս Վորտ Կարդիֆ
• Վորտ Կարդիֆի դուստրը
• Վորտ Կարդիֆի կինը
• Վորտ Կարդիֆի մայրը
• Էդզինգով
• Հուրզոֆ՝ Տրիֆուլգասի շունը

Նմանություն ուրիշ ստեղծագործությունների հետ

Պատմությունը հիշեցնում է Չարլզ Դիքքենսի «Ամանորյա երգ» պատմվածքը, որը հրատարակվել է 1843 թվականին։ Երկուսում էլ հերոսը շահագրգռված է միայն դրամական կողմով, սրտում կարեկցության համար տեղ չկա։ Երկու հերոսներին էր գիշերվա ընթացքում այցելում են երեք արարած (անցյալի, ներկայի և ապագայի հոգիները Սկրուդջի համար և ձկնորսի աղջիկը, կինը և մայրը Տրիֆուլգասի համար),որոնք առաջարկում են փոխել կենցաղը։ Վերջապես երկուսն էլ բախվում են իրենց սեփական մահվան հետ։

Աղբյուրներ

Մեդիա ֆայլեր

Վիքիպահեստ նախագծում կարող եք այս նյութի վերաբերյալ հավելյալ պատկերազարդում գտնել Ֆրիտ Ֆլակ կատեգորիայում։

• «Ֆրրիտ Ֆլակ»-ը Ֆանտաստիկայի Լաբորատորիայում
• «Ֆրրիտ Ֆլակ»-ը Bookmate.com-ում
• Ժորժ Ռուի նկարազարդումները (1886) Արխիվացված 2020-01-28 Wayback Machine
• "Ֆրրիտ Ֆլակ" Արխիվացված 2014-08-19 Wayback Machine հասանելի է Ժյուլ Վեռնի հավաքածուում Արխիվացված 2005-04-15 Wayback Machine ֆր.