Քրիստոսի հարություն (Ֆաբերժեի ձու)

«Քրիստոսի հարություն» (ռուս.՝ Воскресение Христово), ոսկերչական ձու, որը դարձավ Ֆաբերժեի 52 զատկական ձվերից մեկը՝ պատրաստված Կարլ Ֆաբերժեի ընկերությունում Ռուսաստանի կայսերական ընտանիքի համար։ Այն ստեղծվել է 1894 թվականին Ալեքսանդր III կայսեր պատվերով՝ կնոջ՝ կայսրուհի Մարիա Ֆեոդորովնայի համար։

Քրիստոսի հարություն
Ստեղծման թնական	1894
Պատվիրատու	Ալեքսանդր III
Ներկա սեփականատեր
Սեփականատեր	Մարիա Ֆյոդորովնա, Alfred Suenson-Taylor, 1st Baron Grantchester?, Մալքոլմ Ֆորբս, Ֆորբս ընտանիք և Վիկտոր Վեկսելբերգ
Հավաքածու	Սանկտ Պետերբուրգի Ֆաբերժեի թանգարան
Դիզայն և նյութեր
Նյութեր	ոսկի, Լեռնային բյուրեղապակի, ալմաստ, մարգարիտ և արծնապակի
Բարձրություն	98 միլիմետր
Ֆաբերժեի ձվեր

Այսօր ոսկերչական ձուն պահպանվում և ցուցադրվում է Ֆաբերժեի թանգարանում (Նարիշկինների և Շուվալովների պալատ, Սանկտ Պետերբուրգ, Ռուսաստան)։

Նկարագիր

Ձուն պատրաստված է լեռնային բյուրեղապակուց, որն ուղղահայաց եզրազարդված է ադամանդակուռ եզրազարդով։ Ներսում տեղադրված է արձանախումբ։ Կենտրոնում Հիսուս Քրիստոսն է, որի երկու կողմերում ծնկաչոք հրեշտակներ են՝ գերեզմանի մոտ։ Արձանները պատրաստված են ադամանդներից և էմալից։ Տակդիրն իրենից ներկայացնում է քառամաս դրվագազարդ ոտք, որի յուրաքանչյուր հատվածում մեկ մարգարիտ կա և ևս մեկը՝ ձվի տակ։ Ոսկերչական ձվի վրա դրված է Ֆաբերժեի ֆիրմայի գլխավոր ոսկերիչ Միխայիլ Եվլամպիևիչի դրոշմը, ինչպես նաև ոսկու հարգը՝ 14 կարատ։

Պատմություն

Ոսկերչական ձվին նման բնութագրող նկարագիր եղել է Մարիա Ֆեոդորովնայի թանկարժեք իրերի ցուցակում, որը կազմել է Անիչկովների պալատի կառավարիչ գեներալ-մայոր Երեխովիչը։ Ձվին բնութագրող փաստաթուղթ է նաև 1922 թվականին կազմած նկարագիրը, որը կազմվել է կայսերական ինչքի բռնազավթման ժամանակ, երբ ողջ թանկարժեք իրերը տեղափոխվեց Կրեմլի զինապալատ։ Արդյունքում ձուն վաճառվել է ոմն «պարոն Դերեկին»։ 1934 թվականին Լոնդոնի «Christie’s» աճուրդի տանը «Քրիստոսի հարություն» ձուն հանվել է վաճառքի։ Ոսկերչական ձվի կարգավիճակը ցայսօր էլ մնում է անհայտ, քանի որ չունի որևէ գույքահամար և չի նշվում կայսերական ֆոնդի ֆինանսական ոչ մի փաստաթղթում։ Սակայն մասնագետները համարում են, որ ձուն դասվում է «կայսերականների» շարքին։

Անակնկալ

«Քրիստոսի հարություն» ոսկերչական ձուն չունի անակնկալ։ Մի շարք հետազոտողներ և արվեստաբաններ հանգել են այն եզրակացության, որ, հնարավոր է` ձուն հենց ինքը «Վերածնունդ» ոսկերչական ձվի անակնկալն է։ Այն չափերով լրիվ համապատասխանում է, նման է նաև ոճով ու դիզայնով։ «Վերածնունդ» ձվի նկարագրում խոսվում է մարգարտի մասին, ինչը բուն ձվի վրա չի օգտագործվել, իսկ «Քրիստոսի հարություն» ոսկերչական ձվում օգտագործվել է։

Տես նաև

• Ֆաբերժեի ձվեր

Արտաքին հղումներ

• На сайте музея Արխիվացված 2017-04-05 Wayback Machine

Մեդիա ֆայլեր

Վիքիպահեստ նախագծում կարող եք այս նյութի վերաբերյալ հավելյալ պատկերազարդում գտնել Քրիստոսի հարություն (Ֆաբերժեի ձու) կատեգորիայում։