Վնասվածքաբանության և օրթոպեդիայի գիտական կենտրոն (Երևան)

Վնասվածքաբանության և օրթոպեդիայի գիտական կենտրոն (ՎՕԳԿ), օրթոպեդո-վնասվածքաբանական կանխարգելիչ ծառայություն իրականացնող առողջապահության առաջադեմ բնագավառներից մեկը։ Որպես օրթոպեդիկ հաստատություն՝ կենտրոնը հիմնադրվել է 1946 թվականին պրոֆեսոր Քրիստափոր Պետրոսյանի կողմից։

Վնասվածքաբանության և օրթոպեդիայի գիտական կենտրոն
Տեսակ	գիտահետազոտական ինստիտուտ
Երկիր	Հայաստան
Հիմնադրված	1946
Տեղագրություն	Հայաստան, Երևան
տնօրեն	Վաչագան Այվազյան

Պատմություն

1946 թվականին հիմնադրված հաստատության գլխավոր նպատակն է եղել բժշկական օգնություն ցուցաբերել Երկրորդ համաշխարհային պատերազմի տարիներին անդամալույծ դարձած մարդկանց։ 1959 թվականին Հայաստանի Վնասվածքաբանության և օրթոպեդիայի կենտրոնը վերանվանվել է Ք. Հ. Պետրոսյանի անվան Երևանի Վնասվածքաբանության և օրթոպեդիայի գիտահետազոտական ինստիտուտ (ՎՕԳՀԻ)։

1988 թվականի Սպիտակի երկրաշարժի ժամանակ Երևանի ՎՕԳՀԻ բժշկական անձնակազմը ցուցաբերել է մասնագիտական հմտություն և շուրջ 1500 տուժածներ բուժվել են Երևանի ՎՕԳՀԻ-ում։ 1989 թվականին ՀՀ պաշտպանության նախարարի հրամանով Երևանի ՎՕԳՀԻ -ը դարձել է տեղային պատերազմներից տուժածներին բժշկական օգնություն ցուցաբերող կենտրոն։ Հետագայում ՀՀ պաշտպանության նախարարության Կենտրոնական զինվորական հոսպիտալում բացվել է վնասվածքաբանության բաժանմունք և կազմակերպվել ՀՀ բանակի վնասվածքաբանության ծառայություն։

Երևանի ՎՕԳՀԻ 1995 թվականին վերանվանվել է ՀՀ ԱՆ Վնասվածքաբանության, օրթոպեդիայի և վերականգնողական կենտրոն և ՀՀ վնասվածքաբանության ու օրթոպեդիայի գիտահետազոտական, գիտամեթոդական, ուսումնական և պրակտիկայի կենտրոն, 2003 թվականին, ՀՀ Կառավարության որոշմամբ, միացվել է Այրվածքների և Ճառագայթաբանության գիտահետազոտական կենտրոնին։

2007 թվականին անվանվել է Վնասվածքաբանության և օրթոպեդիայի գիտական կենտրոն։

Գործունեություն

ՎՕԳԿ գիտական ու կլինիկական հնարավորությունները ներառում են հենաշարժական համակարգի վնասվածքների, հիվանդությունների և զարգացման արատների ժամանակակից բուժման բոլոր եղանակները։

Կենտրոնը համագործակցում է օտարերկրյա մասնագետների և տարբեր բուժկենտրոնների հետ, կազմակերպվում են երկկողմանի գիտական գործուղումներ, սեմինարներ, փորձի փոխանակում և այլն։ Գիտական աշխատանքները հրատարակվում են և հայկական, և միջազգային պարբերականներում։

Բաժանմունքներ

• Անզգայացման և վերակենդանացման բաժանմունք
• Հետվնասվածքային և ինֆեկցիոն բարդությունների բաժանմունք
• Մեծահասակների օրթոպեդիայի և ոսկրային ախտաբանության բաժանմունք
• Մանկական վնասվածքների և օրթոպեդիայի բաժանմունք
• Փորձարարական-մորֆոլոգիական լաբորատորիա և ոսկրային բանկ
• Ֆիզիոթերապևտիկ բաժանմունք
• Ընդհանուր վիրաբուժության բաժանմունք
• Բազմակի վնասվածքների բաժանմունք
• Սուր վնասվածքների բաժանմունք
• Տեխնիկական օրթոպեդիայի բաժանմունք
• Սրտաբանական կաբինետ
• Վերականգնողական բաժանմունք
• Ընդունարան
• Լաբորատորիա
• Ռենտգեն բաժանմունք
• Սոնոգրաֆիայի կաբինետ

• Արյան բանկ