Բոազ Մաուդա

Բոազ Մաուդա (եբրայերեն՝ בועז מעודה‎, ապրիլի 23, 1987(1987-04-23), Eliakim, Megiddo Regional Council, Իսրայել, Հյուսիսային մարզ, Իսրայել), իսրայելցի երգիչ, «Կոխավ Նոլադ» շոուի հինգերորդ եթերաշրջանի և «Pop Idol» հաղորդման իսրայելական տարբերակի հաղթողը, որը 2008 թվականին Եվրատեսիլում ներկայացրել է Իսրայելը և զբաղեցրել 9-րդ հորիզոնականը։

Բոազ Մաուդա
Ծնվել է	ապրիլի 23, 1987(1987-04-23) (36 տարեկան) Eliakim, Megiddo Regional Council, Իսրայել, Հյուսիսային մարզ, Իսրայել
Երկիր	Իսրայել
Ժանրեր	փոփ
Մասնագիտություն	երգիչ
Գործիքներ	վոկալ
Կայք	boazmauda.com
Boaz Mauda Վիքիպահեստում

Եվրատեսիլ 2008 երգի մրցույթի կիսաեզրափակիչ

Կենսագրություն

Բոազը ծնվել և մեծացել է Էլյակիմ գյուղում, որտեղ մինչ օրս բնակվում է ծնողների և երկու եղբայրների հետ։ Տան կրտսեր զավակն է։ Բոազի ծնվելու ժամանակ մայրը դարձել է հաշմանդամ։ Բոազի ընտանիքն ունի Եմենի հրեական ծագում։

Եվրատեսիլ 2008

2007 թվականի նոյեմբերի 14-ին իսրայելական հեռարձակող կորպորացիան և 2-րդ հեռուստաալիքը հայտարարել են, որ «Կոխավ նոլադ» («Ծնվող աստղ») հաղորդման 5-րդ եթերաշրջանի հաղթող Բոազ Մաուդան 2008 թվականին Սերբիայի մայրաքաղաք Բելգրադում կայանալիք Եվրատեսիլին պետք է ներկայացնի Իսրայելը։

Նախնական ընտրությունն անցկացվել է 2008 թվականի փետրվարին, որտեղ Մաուդան երգել է 5 երգ, և իսրայելցի փորձագետներից բաղկացած մրցատյանը և հեռուստադիտողները քվեարկել են «Կեիլու Կան» («Կարծես թե այստեղ») երգին, որի հեղինակն էր 1998 թվականի Եվրատեսիլի հաղթող Դանա Ինթերնեշնլը։

Մաուդան 2008 թվականի մայիսի 20-ին մասնակցել է Եվրատեսիլի առաջին կիսաեզրափակչին, որտեղ զբաղեցրել է 5-րդ հորիզոնականը։ Մայիսի 24-ին՝ եզրափակչի ժամանակ, նա հավաքել է 124 միավոր և զբաղեցրել 9-րդ հորիզոնականը։

Եվրատեսիլից հետո

Բոազի առաջին սինգլը՝ «Օրեախ բաոլամ» («Հյուր աշխարհում»), թողարկվել է 2008 թվականի օգոստոսի 3-ին։ Բոազը հայտարարել է, որ շուտով իր առաջին ալբոմում՝ «Բոազ Մաուդա»-ում, ներառելու է երգերի շարք։ 2009 թվականի մարտին թողարկվել է երկրորդ սինգլը՝ «Լախզոր աբայթա» («Հետդարձ տուն»), ինչպես նաև նույն թվականին Բոազը Եվրատեսիլի երկու մասնակիցների՝ հայուհի Սիրուշոյի և սերբուհի Ելենա Տոմաշևիչի հետ ձայնագրել է «Time to pray» («Աղոթելու ժամանակ») երգը, որը նվիրված է հայերի, հրեաների և սերբերի ցեղասպանությանը։

2009 թվականի հուլիսի 7-ին թողարկվել է առաջին ստուդիական ալբոմը՝ «Բոազ Մաուդա»-ն, որը բաղկացած է 11 երգերից։ Նույն թվականին Բոազը նկարահանվել է «Ջոնի Հոլիվուդ» սերիալում՝ խաղալով երգիչ Իցխար Կոենի դերը, իսկ օգոստոսին կազմակերպել է հյուրախաղեր։

Սկավառակագրություն

• 2007
  • Mi Haya Ma'amin
  • Menagen Ve'Shar
• 2008
  • Ke'ilo kan (The Fire in Your Eyes)
  • Oreakh BaOlam
• 2009
  • Lakhzor HaBaita
  • Time To Pray (feat. Սիրուշո և Ելենա Տոմաշևիչ)
• 2011
  • Shniya Ve'od Ahat

Տես նաև

• Իսրայելը Եվրատեսիլ երգի մրցույթում

Արտաքին հղումներ

• Պաշտոնական կայք
• Հոդված «Y-net»-ում

Վիքիպահեստն ունի նյութեր, որոնք վերաբերում են «Բոազ Մաուդա» հոդվածին։