'''Տրդատ Բ (մոտ 194 - 256 թթ.)''', Հայոց թագավոր [[217]]-[[252]] թվականներին, [[Արշակունիներ|Արշակունիների արքայատոհմից]], Խոսրով Ա-ի որդին։
== Գործունեությունը ==
216թ.-ին մայիսին Հռոմեական կայսր [[Կարակալլա]]ն իր մոտ կանչեց Հայոց Խոսրով Ա թագավորին և նրա կնոջը ու բանտարկեց։ Կարակալայի այդ տմարդի արարքը հանգեցրեց Հայաստանում [[Հռոմեական կայսրություն|Հռոմի]] դեմ ապստամբության։ Հռոմի կայսրը ապստամբ հայերի դեմ է ուղարկում իր զորավարներից Թեոկրիտոսին, որ սակայն պարտություն է կրում և հեռանում Հայաստանից։ Հայոց գահ է բարձրանում Տրդատ Բ-ն։ 217թ. ապրիլի 8-ին Կարակալլան սպանվում է իր զինվորներից մեկի ձեռքով,իսկ նրան հաջորդած Մակրինոսը նույն տարվա հունիսի 8-ին [[Մծբին]]ի մոտ պարտություն է կրում պարթևահայկական միացյալ զորքից և ստիպված է լինում բանտից ազատել դեռևս Կարակալլա կայսեր կողմից բանտարկված հայոց թագուհուն, ինչպես նաև [[Մեծ Հայք]]ի թագավորությանն է վերադարձնում [[Փոքր Հայք]]ն ու Գիմաթենե գավառը։ 224թ.-ի ապրիլի 28-ին [[Արտաշիր Պապական|Արտաշիր Սասանյանը]] Որմզդականի ճակատամարտում պարտության է մատնում Տրդատ Բ-ի դաշնակից [[Պարթևաստան|Պարթևստանի]] արքա [[Արտավան Ե Պարթև|Արտավան Ե Արշակունուն]], խորտակում պարթևական պետությունը և հռչակվում [[Սասանյան Պարսկաստան]]ի առաջին թագավոր։ Պարթևստանի վերջին թագավոր Արտավան Ե-ը զոհվում է մարտի դաշտում։
