Եղջերատերև

Եղջերատերև
Գիտական դասակարգում
Թագավորություն Խոտաբույսեր Տիպ Ծածկասերմեր Դաս Միաշաքիլավորներ Կարգ Հակինթածաղկավորներ Ընտանիք Եղջերատերևազգիներ Ցեղ Եղջերատերև
Լատիներեն անվանում
Ceratophyllum
Դասակարգումը Վիքիցեղերում Պատկերներ Վիքիպահեստում

Եղջերատերև (լատին․՝ Ceratophyllum), եղջերատերևազգիների ընտանիքի բազմամյա ջրային խոտաբույսերի ցեղ: Հայտնի է մոտ 10, ՀՀ-ում՝ 2 տեսակ՝

• Եղջերատերև ջրասույզ (լատին․՝ Ceratophyllum demersum)
• Եղջերատերև կիսաջրասույզ (լատին․՝ Ceratophyllum submersum):

Տարածված է ՀՀ բոլոր ցածրադիր և միջին լեռնային գոտիների լճերում ու լճակներում (Արփա, Սևան, Պարզ, ժանգոտ, Տզրուկի, Մեծամոր և այլն), նաև դանդաղահոս գետերում (Մեծամոր, Արգիճի, Հրազդան և այլն): Արմատներ չունի, ցողունը հանգուցավոր է, երկարությունը՝ մինչև 1 մ: Տերևները եղանաձև կտրտված են փնջերով և օղակաձև դասավորված ցողունների միջհանգույցներում: Ծաղիկները մեկական են, մանր, տերևանութային, միատուն: Արական (կանաչավուն) և իգական (սպիտակավուն) ծաղիկները տեղադրվում են բույսի տարբեր հանգույցներում: Ծաղկում է հունիսին (փոշոտումը կատարվում է ջրի տակ): Պտուղը 3 փշիկներով (1-ը՝ պտղի գագաթին, 2-ը՝ հիմքում և դեպի ցած ծալված) ընկուզիկ է: Բազմանում է սերմերով և վեգետատիվ ճանապարհով (ծայրային ընձյուղներով՝ տուրիոններով): Եղջերատերևը կեր է ջրլող թռչունների և ջրային կենդանիների համար, նպաստում է ջրամբարների կենսաբանական մաքրմանը և տիղմի առաջացմանը: Ակվարիումային բույս է:

Այս հոդվածի կամ նրա բաժնի որոշակի հատվածի սկզբնական տարբերակը վերցված է Հայաստանի բնաշխարհ հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։