'''Կիրակոս Աղբակեցի''', Կիրակոս քահանա (ծննդի և մահվան թվականներն անհայտ են)- XIV դ. 1-ին կեսի հայ գրիչ և մանրանկարիչ։ Ապրել և ստեղծագործել է Վասպուրականի [[Աղբակ]] գյուղաքաղաքում։ [[Երևան]]ի [[Մեսրոպ Մաշտոց]]ի անվան [[Մատենադարան]]ում պահպանվում են Կիրակոս Աղբակեցու ընդօրինակած կամ պատկերազարդած՝ [[1318]]-[[1319]]թթ.-ի, [[1330]]թ.-ի, [[1332]]թ.-ի, [[1351]]թ.-ի, XIV դ. Ավետարանները և [[1352]]թ.-ի ժողովածուն, երկու ձեռագիր Ավետարաններ գտնվում են [[Նոր Ջուղա]]յում և [[Հալեպ]]ում։ Կիրակոս Աղբակեցու անվանն է առնչվում [[Վասպուրական]]ի մանրանկարչության դպրոցի ինքնատիպ ճյուղավորումներից մեկը։ Նրա պատկերած կերպարներն ու առարկաները խիստ պարզեցված են։ Արտահայտման հիմնական միջոցը՝ գիծը, առավելապես ենթարկված է զարդային կառուցվածքին։ Մանրանկարների ոճավորումն ու թափանցիկ գուներանգը արևելյան արվեստի հրապույրն ունեն։
