Սուրեն Հովհաննիսյան (մանկավարժ)
Սուրեն Սարիբեկի Հովհաննիսյան (1912, Վահագնի, Ալեքսանդրապոլի գավառ, Երևանի նահանգ, Կովկասի փոխարքայություն, Ռուսական կայսրություն - 1982), հայ մանկավարժ։ ՀԽՍՀ վաստակավոր մանկավարժ (1953): Հայրենական մեծ պատերազմի մասնակից։ ԽՄԿԿ անդամ (1940):
Սուրեն Հովհաննիսյան | |
---|---|
Ծնվել է | 1912 |
Ծննդավայր | Վահագնի, Ալեքսանդրապոլի գավառ, Երևանի նահանգ, Կովկասի փոխարքայություն, Ռուսական կայսրություն |
Մահացել է | 1982 |
Քաղաքացիություն | Ռուսական կայսրություն և ԽՍՀՄ |
Կրթություն | Հայկական պետական մանկավարժական համալսարան |
Մասնագիտություն | մանկավարժ |
Կուսակցություն | ԽՄԿԿ |
Պարգևներ և մրցանակներ |
Կենսագրություն խմբագրել
Սուրեն Հովհաննիսյանը ծնվել է 1912 թվականին Գուգարքի շրջանի Վահագնի գյուղում։ Ավարտել է Կիրովականի մանկավարժական տեխնիկումը։ 1931 թվականին ուսուցչական աշխատանքի է անցել Սպիտակի շրջանի Գյորան (այժմ՝ Գոգարան) գյուղում։ Մեկ տարի աշխատելուց հետո տեղափոխվել է հայրենի գյուղ և շարունակել մանկավարժական գործունեությունը[1]։
Երևանի պետական մանկավարժական ինստիտուտի 4-րդ կուսի ուսանող էր Սուրենը, երբ սկսվել է Հայրենական մեծ պատերազմը։ 1941 թվականի հունիսի վերջից մինչև դեկտեմբերը սովորել է Թբիլիսիի ռազմաքաղաքական ուսումնարանում, որն ավարտելուց հետո, 1942 թվականի սկզբին մեկնել է ռազմաճակատ։ Թշնամու դեմ մղված մարտերից մեկում՝ Չեչենո-Ինգուշական ԻԽՍՀ-ի Տերսկայա գյուղի մոտ վիրավորվել է և ուղարկվել բուժման։ 1942 թվականի դեկտեմբերին շարունակել է կռվել գերմանաֆաշիստական զավթիչների դեմ 89-րդ հայկական Թամանյան դիվիզիայի կազմում։ Երկրորդ անգամ վիրավորվել է Կրասնոդարի մոտակայքում, ապաքինվելուց հետո սովորել է տանկային, ապա՝ հրաձգաականանետային ուսումնարանում։ Կռվել է նաև Կարպատներում։ Բանակից զորացրվել է 1945 թվականի հոկտեմբերին լեյտենանտի կոչումով։ Հովհաննիսյանը պարգևատրվել է Հայրենական պատերազմի 2-րդ աստիճանի շքանշանով և մի շարք մեդալներով։
Պատերազմից հետո Հովհաննիսյանը երկար տարիներ աշխատել է Վահագնի դպրոցում։ 1953 թվականին արժանացել է Հայկական ԽՍՀ վաստակավոր ուսուցչի կոչման։ 1940 թվականին ընդունվել է ԽՄԿԿ շարքերը[1]։
1960 թվականից Հովհաննիսյանն աշխատել է Կիրովականի դպրոցներում, դասավանդել է ֆիզիկա և մաթեմատիկա։ Կենսաթոշակի է անցել 1976 թվականին[1]։
Սուրեն Հովհաննիսյանը մահացել է 1982 թվականին։
Պարգևներ խմբագրել
- ՀԽՍՀ վաստակավոր մանկավարժ
- Հայրենական պատերազմի 2-րդ աստիճանի շքանշան