Պապկովի տուն
Պապկովի տուն (ռուս.՝ Дом Папкова, հայտնի է նաև որպես Ռեմիի տուն, ռուս.՝ Дом Реми), XIX դարի սկզբի առանձնատուն Ռուսաստանի Ռոստովի մարզի Տագանրոգ քաղաքի կենտրոնում (Շմիդտի փողոց, № 17)։
 | |
|---|---|
 | |
| Տեսակ | տեսարժան վայր և շենք |
| Երկիր |  Ռուսաստան |
| Տեղագրություն | Տագանրոգ |
| Ճարտարապետական ոճ | կլասիցիզմ |
| Ժառանգության կարգավիճակ | Ռուսաստանի մարզային նշանակության մշակութային ժառանգության օբյեկտ |
 | |
 | |
Պատմություն խմբագրել
Շենքը կառուցվել է 1808 թվականին ռուսական գավառական կլասիցիզմի ոճով։ Տունը եղել է Տագանրոգի քաղաքագլուխ Պյոտր Պապկովի մասնավոր կալվածքը։ Տագանրոգից նրա հեռանալուց հետո տունը դարձել է եկամտաբեր։ 1847-1856 թվականներին այստեղ դուստրերի հետ բնակվել է Պապկովի անժամանակ վախճանված ընկերակից Յ. Մորոզովի այրին։ Նրա դուստրերից մեկը` Եվգենյան, հետագայում դարձել է Անտոն Չեխովի մայրը։
Պապկովից հետո շենքը ժառանգաբար անցել է նրա զարմուհուն` բարոնուհի Ֆիտինգոֆին, և արդեն նրանից տնատիրությունն անցել է գեներալ-մայոր, զորացրվելուց հետո` կալվածատեր Ալեքսանդր Ռեմիին։ 1840-1841 թվականներին Կովկաս գնալու ճանապարհին Պապկովի շենք է այցելել Ռեմիի ծառայակից Միխայիլ Լերմոնտովը։ 1890-ական թվականներից շենքը պատկանել է Ռեմիի կնոջը` Մարիային, XX դարի սկզբից` դստերը` Եկատերինային, իսկ նրա եղբայր Նիկոլայը տան սեփականատեր է դարձել 1917 թվականի Հոկտեմբերյան հեղափոխությունից անմիջապես առաջ[1]։
1900-ական թվականներին Ռեմիի ժառանգները սկսել են իրենց կալվածքը վարձակալությամբ հանձնել քաղաքային և պետական հաստատություններին։ Սկզբում այստեղ գործել է զինվորական ղեկավարության վարչությունը, այնուհետև 1910 թվականից Զորքերի բնակարանային բավարարման շրջանային վարչությունը, շրջանային տպարանը, Տագանրոգի շրջանային պետի վարչությունը։ 1914 թվականին սկսված Առաջին համաշխարհային պատերազմի պատճառով տունն անհատույց փոխանցվել է վիրավորների համար առողջարանին։ Խորհրդային տարիներին շենքում եղել են կոմունալ բնակարաններ[2]։
1976 թվականից Պապկովի շենքը մշակութային ժառանգության տեղական նշանակության օբյեկտ է[3]։
Ճարտարապետություն խմբագրել
Շենքի կոմպոզիցիան պարզ է։ Ճակատը համաչափ է, զարդարված է դորիական օրդերի վեց հարթ սյուներով, որոնք պահում են եռանկյունաձև ճակտոնը։ Ներքևում սյուները միանում են ճաղաշարքերով։ Առաջին (տնտեսական) հարկի պատուհանները քառակուսի են։ Երկրորդ և երրորդ հարկերի ուղղանկյուն պատուհանները զարդարված են զարդաքիվերով։ Երկրորդ հարկի ամբողջ պարագծով ուղղանկյուն ատամնիկներով ամբողջական քիվ է։ 1828 թվականին կիսահարկի վերնակառուցման արդյունքում եռանկյունաձև ճակտոնը բարձրացվել է մեկ հարկ վերև։ Վերանորոգումից հետո սյունաշարքն իր վրա է վերցնում երրորդ հարկի լայն պատշգամբի ծանրությունը, որը ստեղծում է ատտիկոսի տպավորություն[4]։ Մշակութային ժառանգության տեղական նշանակության օբյեկտ է։
Տես նաև խմբագրել
Ծանոթագրություններ խմբագրել
- ↑ Дмитрий Зиньковский, Оксана Пурахина. Дом Папкова. Борсолино. Վերցված է 2017 թ․ հունվարի 25-ին.
- ↑ «Дом 17». Исторический Таганрог. Արխիվացված է օրիգինալից 2013 թ․ հոկտեմբերի 15-ին. Վերցված է 2017 թ․ հունվարի 24-ին.
- ↑ «Дом градоначальника Папкова». Վերցված է 2017 Փետրվար 16-ին.(չաշխատող հղում)
- ↑ «Русский классицизм» (ռուսերեն). Rostov Region. Վերցված է 2017 թ․ հունվարի 24-ին.