Ներեուհիներ

Ներեուհիներ (հին հունարեն՝ Νηρηΐδες), ծովային ոգիներ են՝ նիմփաներ, ծովային աստված Ներևսի և Դորիսի դուստրերը։ Ըստ Հոմերոսի նրանք թվով երեսունչորսն են (ըստ ուրիշ առասպելների՝ հարյուրից ավել, առավել հաճախ՝ 50)։ Ներեուհիներն ապրում են ծովի խորքում, իրենց հոր ապարանքի արծաթե քարանձավում, մանում են ոսկե իլիկներով, շուրջպար են բռնում ալիքների տակտով, իսկ լուսնկա գիշերներին դուրս են գալիս ափ, որտեղ երգում ու պարում և մրցում են տրիտոնների հետ։ Ներեուհիները բարյացակամ են մարդկանց հանդեպ, նավազներին օգնում են վտանգի պահին (նրանք օգնել են արգոնավորդներին՝ հաղթահարելու Պլանկտաները, Հեփեստոսի կռած զենքը հասցրել են Աքիլլեսին և այլն)։

Ծովացուլ հեծած ներեուհին

Առավել հայտնի ներեուհիներ են՝

• Ամփիտրիտեն` Պոսեյդոնի կինը,
• Թետիսը` մահկանացու Պելևսի կինը և Աքիլլեսի մայրը,
• Ակիսի սիրուհի Գալատեյան։

Ներեուհիներին մեծարում էին կղզիների և Հունաստանի առափնյա շրջանների բնակիչները։ Ներեուհիները պատկերվում էին թեթևազգեստ գեղանի աղջիկների տեսքով, շրջապատված ծովային հրեշներով, առավել հաճախ դելփինների կամ տրիտոնների ուսերին։ Հայտնի են Գալատեյայի և Պոլիփեմոսի պատկերով որմնանկարներ (Պոմպեյ) և այլն։ Պոեզիայում ներեուհիները ծովային ալիքների անձնավորումն են։