Մկրտիչ Սեդրակյան

Մկրտիչ Հովհաննեսի Սեդրակյան (փետրվարի 7, 1922(1922-02-07), Վաղարշապատ, Հայկական ԽՍՀ - 2009, Երևան, Հայաստան), հայ նկարիչ, ՀԽՍՀ վաստակավոր նկարիչ (1967), ՀԽՍՀ ժողովրդական նկարիչ (1985), Երկրորդ համաշխարհային պատերազմի մասնակից։

Մկրտիչ Սեդրակյան
Ի ծնե	Մկրտիչ Հովհաննեսի Սեդրակյան
Ծնվել է	1922, փետրվարի 7
Ծննդավայր	Վաղարշապատ
Վախճանվել է	2009
Մահվան վայր	Երևան
Ազգություն	հայ
Քաղաքացիություն	ԽՍՀՄ և  Հայաստան
Կրթություն	Փանոս Թերլեմեզյանի անվան գեղարվեստի պետական քոլեջ (1941) և Երևանի պետական գեղարվեստաթատերական ինստիտուտ (1952)
Մասնագիտություն	նկարիչ
Պարգևներ	, , և
Անդամակցություն	Հայաստանի նկարիչների միություն

Կենսագրություն

Մկրտիչ Սեդրակյանի հուշատախտակը Երևանի Կիևյան 24 հասցեում

1938-1941 թվականներին սովորել է Երևանի Փանոս Թերլեմեզյանի անվան գեղարվեստի ուսումնարանում։ 1941-1945 թվականներին մասնակցել է «Հայրենական մեծ պատերազմին»։ Քութայիսի կրտսեր հրամանատարական կուրսերն ավարտելուց հետո որպես 10-րդ առանձին հրաձգային բրիգադի հրամանատար, գերմանական ուժերի դեմ 1942-1943 թվականներին կռվել է Մոզդոկում, Տուապսեում, հետո միացել է 18-րդ բանակի զորքերին, վեց ամիս մարտեր է մղել Մալայա Զեմլյայի և Նովոռոսիյսկի ազատագրման համար, մասնակցել Ղրիմի, Կերչի, Սևաստոպոլի, Սիմֆերոպոլի, Յալթայի ազատամարտերին։ Բելոռուսական ռազմաճակատի (հրամանատար՝ գեներալ Գեորգի Ժուկով) մարտիկների հետ հետապնդելով թշնամուն, հասել է մինչև Բեռլին։ 1946 թվականին շքանշաններով ու մեդալներով պարգևատրված, Սեդրակյանը վերադարձել է հայրենի Էջմիածին։

1946-1952 թվականներին սովորել է Երևանի գեղարվեստա-թատերական ինստիտուտում, 1967 թվականից դասավանդել է նույն ինստիտուտում, պրոֆեսոր (1986): 1952 թվականից եղել է Հայաստանի նկարիչների միության անդամ։ 1985 թվականին «Խորհրդային արվեստ» ամսագրի 9-րդ համարում տպագրվել է Սեդրակյանի «Բեռլին, 1945 թվականի մայիս» ստեղծագործությունը։ Սեդրակյանի ռազմի բոլոր կտավներին դիպուկ են հումանիզմն ու լավատեսությունը։

Ստեղծագործական ուղի

Մկրտիչ Սեդրակյանը բազմաժանր նկարիչ է։ Ստեղծել է պատմական, պատմահեղափոխական թեմաներով կոմպոզիցիաներ՝

• «Քսանվեցը», 1956
• «Արևածագին», 1967
• «Գայ։ Առջևում է Սիմբիրսկը», 1969
• «1915 թվական», 1960
• «Երևանի բերդի գրավումը», 1978
• «Դեր Զոր», 1979
• «Արա Գեղեցիկ և Շամիրամ», 2003

բնանկարներ`

• «Բջնի», 1965
• «Աշտարակի կիրճը», 1969
• «Սևան», 1999

դիմանկարներ`

• «Ուսանող», 1967
• «Վարդանի դիմանկարը», 1967

նատյուրմորտներ`

• «Հին աշխարհից», 1967
• «Նատյուրմորտ», 1968

Սեդրակյանի կտավներին բնորոշ է կոմպոզիցիայի կառուցիկությունը, պատկերման հավաստիությունը։

1952 թվականից մասնակցել է հանրապետական, միութենական և արտասահմանյան ցուցահանդեսների։ Նրա կտավները գտնվում են Հայաստանի ազգային պատկերասրահում, նրա մասնաճյուղերում, Հայաստանի պատմության, հեղափոխության և այլ թանգարաններում։

Անհատական ցուցահանդեսներ

• Երևան, 1973, 2002
• Էջմիածին, 1973
• Սան Ֆրանցիսկո, 2000
• Լոս Անջելես, 2001
• Սան Խոսե, 2001

Մրցանակներ

Պարգևատրվել է Հայրենական պատերազմի 2-րդ աստիճանի շքանշանով։

Գրականություն

• Մկրտիչ Սեդրակյան։ Կատալոգ (առաջաբանը՝ Ե․ Մարտիկյանի), Ե․, 1972։

Արտաքին աղբյուրներ

• Ուրույն ձեռագիր և հայրենասիրական պաթոս, Մկրտիչ Սեդրակյան