ՀՀ ԳԱԱ հիդրոէկոլոգիայի և ձկնաբանության ինստիտուտ

ՀՀ ԳԱԱ հիդրոէկոլոգիայի և ձկնաբանության ինստիտուտ, ինստիտուտ Հայաստանում։

Կազմակերպվել է 1991 թվականին՝ Սևանի ջրակենսաբանական կայանի (1936) հիման վրա (1923-1936 թվականներին՝ Սևանի ձկնաբուծական կայան)։

Հիմնական խնդիրներն են Սևանա լճի ջրաէկոլոգիական հետազոտությունները՝ ջրաֆիզիկական, ջրաքիմիական, ջրակենսաբանական՝ ներառյալ միկրոօրգանիզմների, ջրային բույսերի, նախակենդանիների, անողնաշարավորների, ձկների զարգացման օրինաչափությունների ուսումնասիրությունները, լճի բնական պաշարների պահպանումը և օգտագործումը, լճի վրա ջրհավաք ավազանի ազդեցության գնահատումը և լճային համակարգի մեջ բաղադրիչների մաթեմատիկական մոդելավորումը։

Ունի ջրակենսաբանության, ձկնաբանության և ջրաէկոլոգիայի բաժիններ։ Ինստիտուտում մշակվել և հիմնավորվել են Սևանա լճի էվտրոֆացումը (ջրային ավազանում օրգանական նյութի ավելացումը և ջրի «ծաղկումը») կանխող միջոցառումներ։ ՀՀ բարձրադիր ջրամբարներում (Արփի լճի, Ապարանի, Մանթաշի) գիտականորեն հիմնավորվել է ձկների կլիմայավարժեցման հարցը։

Ստեղծվել է Սևանա լճի և նրա մեջ թափվող գետերի 1900-2005 թվականների ժամանակահատվածի ջրաբանական, ջրաֆիզիկական, ջրաքիմիական, ջրակենսաբանական տվյալների բանկ։ Աշխատանքներ են կատարվում ՀՀ խոշոր ջրային էկոհամակարգերի համանման բանկերի ստեղծման ուղղությամբ։

Այս հոդվածի կամ նրա բաժնի որոշակի հատվածի սկզբնական տարբերակը վերցված է Հայաստանի բնաշխարհ հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։