Հավաքածու

Հավաքածու կամ կոլեկցիա (լատին․՝ collectio՝ հավաքում, հավաքածու), միատեսակ կամ թեմատիկ ընդհանրությամբ առարկաների համակարգված ժողովածու, որն ունի գիտական, պատմական կամ գեղարվեստական արժեք։

Ձևեր

Հավաքածուի հիմք կարող են հանդիսանալ տարաբնույթ առարկաներ, նյութական և հոգևոր մշակույթի հուշարձաններ՝ ձեռագրեր, գրքեր, թղթադրամներ, մետաղադրամներ, նամականիշեր, կերպարվեստի ստեղծագործություններ, ինչպես նաև հանքանյութեր, բույսեր, միջատներ և այլն։ Ձևավորվել են հավաքածուների ստեղծման ինքնուրույն ուղղություններ՝ գիտական, ուսումնական, սիրողական։ Հավաքածուներ ստեղծելիս առաջատար դերը պատկանում է թանգարաններին։

Պատմություն

Հավաքածուներ ստեղծվել են հնուց։ Սակայն հավաքածուն որպես մարդկային գործունեության հատուկ բնագավառ սկզբնավորվել և զարգացել է Վերածննդի դարաշրջանում։ Մեդիչիների ընտանիքի հավաքածույում (Ֆլորենցիա), ի թիվս արվեստի ստեղծագործությունների, կային նաև հանքաքարերի հազվագյուտ նմուշներ։

Եզակի իրերի հավաքածուներ են ունեցել՝

• Լյուդովիկոս XIV-ը,
• Հուլիոս II պապը,
• Լևոն X պապը,
• Պետրոս I-ը,
• Յո. Վ. Գյոթեն։

Տես նաև

• Հայաստանի Հանրապետության հուշադրամներ

Ծանոթագրություններ

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 6, էջ 265)։