Համայնք (Հայաստան)

Անվան այլ կիրառումների համար տե՛ս՝ Համայնք

Համայնք, տեղական ինքնակառավարվող վարչատարածքային միավոր Հայաստանում։ Կազմակերպվել է 1995 թվականի դեկտեմբերից, ներառվում է մարզի մեջ։ Հայաստանում կա 930 համայնք, որից 871-ը՝ գյուղական (1999)։ Ընդգրկում է մեկ կամ ավելի թվով բնակավայրեր, Երևան քաղաքում՝ նաև առանձին թաղամասեր։

Հայաստանի բոլոր բնակավայրերն առանձին կամ այլ բնակավայրի (բնակավայրերի) հետ ընդգրկված են համայնքների մեջ։ Տարբերում են քաղաքային և գյուղական համայնքներ։ Երևան քաղաքի թաղամաս և բնակավայր ընդգրկող համայնքները կոչվում են թաղային համայնքներ։

Մեկ բնակավայր ընդգրկող համայնքին տրվում է այդ բնակավայրի, երկու և ավելի բնակավայր ընդգրկող համայնքին՝ առավել բնակչություն ունեցող բնակավայրի անվանումը։ Մեկից ավելի բնակավայր ընդգրկող համայնքի վարչական կենտրոն համարվում է առավել բնակչություն ունեցող բնակավայրը։

Համայնքի սեփականությունը տնօրինելու, համայնքային հարցեր լուծելու համար 3 տարի ժամանակով ընտրվում են տեղական ինքնակառավարման մարմիններ. համայնքի ավագանի՝ 5-15 անդամով, համայնքի ղեկավար՝ քաղաքապետ, թաղապետ կամ գյուղապետ, որը ձևավորում է իր աշխատակազմը։ Համայնքի ավագանին ղեկավարի ներկայացմամբ հաստատում է համայնքի բյուջեն, վերահսկում՝ դրա կատարումը։

Երբեմն համայնք են անվանվում նաև հայկական տարբեր կազմակերպություններ (կրոնական համայնք, քաղաքային համայնք, հայկական համայնքները սփյուռքում և այլն)։

Այս հոդվածի նախնական տարբերակը կամ նրա մասը վերցված է Հայկական համառոտ հանրագիտարանից, որի նյութերը թողարկված են՝ Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։