Կարեն Անդրեասյան

հայ իրավապաշտպան
Վիքիպեդիայում կան հոդվածներ Անդրեասյան ազգանունով այլ մարդկանց մասին։

Կարեն Արեսի Անդրեասյան (սեպտեմբերի 10, 1977(1977-09-10), Երևան, Հայկական ԽՍՀ, ԽՍՀՄ), հայ իրավաբան։ ՀՀ մարդու իրավունքների պաշտպան (2011-2016), իրավաբանական գիտությունների թեկնածու, Երևանի պետական համալսարանի դոցենտ և ՀՀ փաստաբանների պալատի անդամ։ ՀՀ արդարադատության նախարար(2021-2022թթ.)։ Հայաստանի Հանրապետության Բարձրագույն դատական խորհրդի նախագահ։

Կարեն Անդրեասյան
ՀՀ մարդու իրավունքների պաշտպան
2011 - 2016
Նախորդող Արմեն Հարությունյան
ՀՀ արդարադատության նախարար
օգոստոսի 3, 2021 - հոկտեմբերի 5, 2022
ՀՀ Բարձրագույն դատական խորհրդի նախագահ
 հոկտեմբերի 7, 2022
 
Կրթություն՝ Երևանի պետական համալսարան, Կալիֆոռնիայի համալսարան, Բերքլի և Օքսֆորդի համալսարան
Գիտական աստիճան՝ իրավաբանական գիտությունների թեկնածու
Մասնագիտություն՝ իրավապաշտպան
Ծննդյան օր սեպտեմբերի 10, 1977(1977-09-10) (46 տարեկան)
Ծննդավայր Երևան, Հայկական ԽՍՀ, ԽՍՀՄ
Քաղաքացիություն  Հայաստան

Կենսագրություն

խմբագրել

Կարեն Անդրեասյանը ծնվել է 1977 թվականին։ 1994-2002 թթ. սովորել և մասնագիտացել է մի շարք հաստատություններում, այդ թվում՝ Երևանի պետական համալսարանի իրավաբանական ‎ֆակուլտետում և նույն ֆակուլտետի ասպիրանտուրայում, ԱՄՆ Քալիֆորնիայի նահանգի Բերկլիի համալսարանում, Մեծ Բրիտանիայի Օքսֆորդի համալսարանում, Մարդու իրավունքների կանադական կենտրոնում, Նիդերլանդների եվրոպական լրագրության կենտրոնում։

1997-2000 թթ. աշխատել է ՀՀ պետական մի շարք մարմիններում՝ Երևանի քաղաքապետարանում, ՀՀ պաշտպանության նախարարությունում, առաջին ատյանի դատարանում, ինչպես նաև դասավանդել է մարդու իրավունքներ և վարչական իրավունք թիվ 120 միջնակարգ դպրոցում և ՀՀ Ոստիկանության ակադեմիայում։

2001-2007 թթ. դասավանդել է Երևանի պետական համալսարանի իրավաբանական ֆակուլտետում։

2001-2003 թթ. համատեղությամբ աշխատել է մի շարք հասարակական կազմակերպություններում, այդ թվում՝ ՀՀ իրավաբանների միության անվճար իրավական օգնության կենտրոնում /որպես տնօրեն/, «Քաղաքացիական կրթության ծրագիր» միջազգային կազմակերպությունում /որպես ծրագրի համակարգող/, «Ինտերնյուս» հասարակական կազմակերպությունում /որպես իրավաբան/։ Նշված ժամանակաշրջանում նաև դասավանդել է մարդու իրավունքներ Աբխազիայում, Հարավային Օսիայում և Ղարաբաղում անցկացված լրագրողների համար նախատեսված սեմինարներին։

2003 թվականին աշխատել է Մեծ Բրիտանիայի Օքսֆորդի համալսարանի Սոցիոլոգիական և իրավական հետազոտությունների կենտրոնում՝ որպես ավագ գիտաշխատող։

2003-2004 թթ. որպես միջազգային փորձագետ և խորհրդատու՝ աշխատել է Մեծ Բրիտանիայում գտնվող «Հոդված 19» միջազգային կազմակերպությունում, Հունգարիայում տեղակայված «Բաց Հասարակության իրավական նախաձեռնություն» միջազգային կազմակերպությունում, Բուլղարիայի «Տեղեկատվության մատչելիություն» կազմակերպությունում։

2005-2008 թթ. աշխատել է Ամերիկյան իրավաբանների ընկերակցությունում՝ որպես իրավաբան, հետո գլխավոր իրավաբան, այնուհետև փոխտնօրեն։

2006-2007 թթ. համատեղությամբ աշխատել է որպես ՀՀ Սահմանադրական դատարանի նախագահի խորհրդական։

2008 -2011 թվականներին «ԴԻՖԵՆՍ» իրավաբանական ընկերության տնօրենն էր։

2007-2010 թթ. իրականացրել է մի շարք հեռուստատեսային և հասարակական նախագծեր, այդ թվում՝ Եվրոպական լրագրության կենտրոնի հետ համատեղ կազմակերպել է տեղեկատվական իրավունքի և հետաքննական լրագրության բուհական մրցույթ լրագրող և իրավաբան ուսանողների համար, վարել է «Երկրի թեմա» հաղորդաշարը «Երկիր Մեդիա» հեռուստաընկերությունում, «Իրականում» հաղորդաշարը՝ «Արմենիա» հեռուստաընկերությունում։

2011 թ. մարտի 2-ին ՀՀ Ազգային ժողովի որոշմամբ ընտրվել է ՀՀ Մարդու իրավունքների պաշտպան[1]։

2016 թ. հունվարի 12-ին Կարեն Անդրեասյանը ներկայացրել է հրաժարականի դիմում։ 2016 թ. հունվարի 18-ին կրկնել է հրաժարականի դիմումը, և այն համարվել է ընդունված։

2021 թվականի օգոստոսի 3-ից ՀՀ արդարադատության նախարար։

2022 թվականի հուլիսի 4-ից «Քաղաքացիական պայմանագիր» կուսակցության Կենտրոն վարչական շրջանի տարածքային խորհրդի նախագահ։

2022 թվականի հոկտեմբերի 5-ին իր հրաժարականի դիմումի հիման վրա, նախագահի հրամանագրով ազատվել է արդարադատության նախարարի պաշտոնից։

2022 թվականի հոկտեմբերի 6-ին ազգային ժողովի կողմից ընտրվել է ՀՀ Բարձրագույն դատական խորհրդի անդամ։

2022 թվականի հոկտեմբերի 7-ին ընտրվել է ՀՀ Բարձրագույն դատական խորհրդի նախագահ։

Կարեն Անդրեասյանը շուրջ քսան հրապարակված գիտական հոդվածների, ուսումնական ձեռնարկների և այլ աշխատությունների հեղինակ է[2]։

Անձնական կյանքը

խմբագրել

Ամուսնացած է, ունի երեք երեխա։

Ծանոթագրություններ

խմբագրել
  1. ԿԱՐԵՆ ԱՆԴՐԵԱՍՅԱՆԻՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆ ԸՆՏՐԵԼՈՒ ՄԱՍԻՆ
  2. «Կարեն Անդրեասյան. Մարդկային շփումը իմ միակ հոբին է». mediamax.am. Վերցված է 2016 թ․ դեկտեմբերի 11-ին.

Արտաքին հղումներ

խմբագրել

Կարեն Անդրեասյանի կենսագրությունը ՀՀ մարդու իրավունքների պաշտպանի պաշտոնական կայքում Արխիվացված 2013-06-01 Wayback Machine

Նախորդող
Արմեն Հարությունյան
ՀՀ Մարդու իրավունքների պաշտպան
Կարեն Անդրեասյան

3 մարտի 2011 թ. - 22 հունվարի 2016 թ.
Հաջորդող
Արման Թաթոյան
Նախորդող
Ռուստամ Բադասյան
ՀՀ Արդարադատության նախարար
Կարեն Անդրեասյան

2021 - 2022
Հաջորդող
Գրիգոր Մինասյան