Խաչիկ Համբարձումյան
- Վիքիպեդիայում կան հոդվածներ Համբարձումյան ազգանունով այլ մարդկանց մասին։
Խաչիկ Մկրտչի Համբարձումյան (1916, Շվանիձոր, Զանգեզուրի գավառ, Ելիզավետպոլի նահանգ, Կովկասի փոխարքայություն, Ռուսական կայսրություն - անհայտ), հայ մանկավարժ, Երկրորդ համաշխարհային պատերազմի Արևելյան ճակատի («Հայրենական մեծ պատերազմ», 1941-1945) մասնակից։
| Խաչիկ Համբարձումյան | |
|---|---|
| Ծնվել է | 1916 |
| Ծննդավայր | Շվանիձոր, Զանգեզուրի գավառ, Ելիզավետպոլի նահանգ, Կովկասի փոխարքայություն, Ռուսական կայսրություն |
| Մահացել է | անհայտ |
| Քաղաքացիություն |  Ռուսական կայսրություն և  ԽՍՀՄ |
| Կրթություն | Հայկական պետական մանկավարժական համալսարան |
| Մասնագիտություն | մանկավարժ |
| Պարգևներ և մրցանակներ |  |
Կենսագրություն խմբագրել
Խաչիկ Համբարձումյանը ծնվել է 1916 թվականին, Մեղրիի շրջանի Շվանիձոր գյուղում։ Միջնակարգ կրթությունն ստացել է հայրենի գյուղի և շրջկենտրոնի դպրոցներում։ 1937 թվականին ընդունվել և ավարտել է Երևանի հայկական մանկավարժական ինտիտուտի աշխարհագրության ֆակուլտետը, միաժամանակ դասավանդել է № 6 դպրոցում[1]։
1941 թվականին զորակոչվել է կարմիր բանակ։ 1942 թվականին Համբարձումյանը Դոնբասում մասնակցել է Կրասնայա Զարյա բնակավայրի ազատագրման ուղղությամբ մղված մարտերին, ապա Վորոշիլովսկ քաղաքի պաշտպանությանը։ Մարտերում աչքի է ընկել քաջությամբ, արժանացել է հրամանատարության խրախուսանքին։ Վիրավորվել և հոսպիտալում բուժվելուց հետո մեկնել է Հյուսիսային Կովկաս (Պրոխլադնի), 27-րդ հրաձգային բրիգադը։ Այնուհետև 338-րդ գնդի կազմում Խաչիկ Համբարձումյանը մասնակցել է Ստալինգրադի պաշտպանությանը և Օրյոլ-Կուրսկի աղեղի համար մղված արյունահեղ մարտերին։ Դնեպրի վտակի` Սոժ գետն անցում կատարելիս ծանր վիրավորվել է, տեղափոխվել հոսպիտալ։ Ապաքինվելուց հետո՝ 1943 թվականի նոյեմբերի 25-ին որպես հաշմանդամ, ազատվել է հետագա ծառայությունից և վերադարձել հայրենիք[1]։
1944 թվականին Համբարձումյանը վերսկսել է մանկավարժական աշխատանքը։ 1944-1968 թվականներին աշխարհագրություն է դասավանդել Երևան քաղաքի № 40 դպրոցում, 1968 թվականից՝ № 133 դպրոցում, ղեկավարել պատմության և աշխարհագրության մեթոդ միավորման աշխատանքները։ Ակտիվորեն մասնակցել է հասարակական աշխատանքներին, աշակերտների մեջ դաստիարակել հայրենիքի նկատմամբ անսահման սիրո, նվիրվածության հատկանիշներ։ Բարձր է գնահատվել Համբարձումյանի մարտական և աշխատանքային ծառայությունները։ Համբարձումյանը պարգևատրվել է «1941-1945 թթ. Հայրենական մեծ պատերազմում Գերմանիայի դեմ տարած հաղթանակի համար» և մարտական ու հոբելյանական մի շարք մեդալներով[1]։
Պարգևներ խմբագրել
- «1941-1945 թթ. Հայրենական մեծ պատերազմում Գերմանիայի դեմ տարած հաղթանակի համար» մեդալ