Զոպա նեղատերև
| Զոպա նեղատերև | |
| Դասակարգում | |
| Թագավորություն | Բույսեր (Plantae) |
| Ենթատիպ | Սերմնավոր բույսեր (Spermatophytes) |
| Կարգ | Խուլեղինջածաղկավորներ (Lamiales) |
| Ընտանիք | Խուլեղինջազգիներ (Lamiaceae) |
| Ենթաընտանիք | Կատվադաղձայիններ (Nepetoideae) |
| Տրիբա | Mentheae |
| Ցեղ | Զոպա (Hyssopus) |
| Տեսակ | Զոպա նեղատերև (H. angustifolius) |
| Միջազգային անվանում | |
| Hyssopus angustifolius | |
Զոպա նեղատերև (լատին․՝ Hyssopus angustifolius), խուլեղինջազգիների ընտանիքին պատկանող դեղաբույս։
Նկարագրություն խմբագրել
Հակադիր երկար նեղ և սրածայր տերևներով, կարճաթավ քառանիստ ցողուններով, 30-40 սմ բարձրությամբ կիսաթուփ է։ Տերևների մակերեսը երկու կողմերից ծածկված է եթերային յուղեր պարունակող գեղձային մազիկներով։ Գագաթնային տերևների անութներում աճող կապտամանուշակագույն ծաղիկները կազմում են միակողմանի ողկույզներ։ Նեղ նշտարաձև բաժակաթերթիկներից կազմված խողովակաձև և զանգականման բաժակը ծածկում է խողովակաձև պսակի կեսը։ Երկշուրթ պսակի վերին շուրթն ուղիղ է, ստորին եռաբլթակ շուրթը թեքված է ներքև, իսկ 4 երկուժ առէջները դուրս են գալիս պսակից։ Պտուղը կազմված է չորս եռանիստ ընկուզիկներից[1]։
Տարածվածություն խմբագրել
Աճում է ստորին և միջին լեռնային գոտիների քարքարոտ լանջերին և ժայռերի վրա։ Տարածված է Շիրակի, Լոռու, Տավուշի և Սյունիքի մարզերում։ Մեղրատու և գեղազարդային բույս է[1]։
Նշանակություն խմբագրել
Բուժական նպատակներով օգտագործում են բույսի վերին մասը տերևներով և ցողուններով։ Որոշ եվրոպական երկրներում՝ Ֆրանսիայում, Գերմանիայում և Պորտուգալիայում այս բույսի խոտային մասն օգտագործվում է որպես օֆիցինալ հումք[1]։
Ծանոթագրություններ խմբագրել
- ↑ 1,0 1,1 1,2 Ծատուրյան, Թամարա; Գևորգյան, Մարգարիտա (2014). Պողոսյան, Ա․; Զաքարյան, Ն․ (eds.). Հայաստանի վայրի դեղաբույսեր. Երևան: Լուսակն. էջ 315. ISBN 9789939834689.