Դոմինիկ Սանդա (իսկական անունը՝ Dominique Marie-Françoise Renée Varaigne մարտի 11, 1951(1951-03-11)[1][2][3][…], Փարիզի 12-րդ շրջան, Փարիզ[4]), ֆրանսիացի դերասանուհի, նախկինում եղել է նաև նորաձևության մոդել, խաղացել է 1970-1980-ական թվականների բազմաթիվ համբավված կինոնկարներում, ինչպես նաև՝ թատրոնում։

Դոմինիկ Սանդա
Ծնվել էմարտի 11, 1951(1951-03-11)[1][2][3][…] (73 տարեկան)
ԾննդավայրՓարիզի 12-րդ շրջան, Փարիզ[4]
Քաղաքացիություն Ֆրանսիա
Մասնագիտությունկինոդերասանուհի
Պարգևներ և մրցանակներ
dominiquesanda.com

Կինոյում Դոմինիկ Սանդայի առաջնախաղը եղել է ռուս ականավոր գրող Ֆյոդոր Դոստոևսկու «Հեզաբարո կինը» վիպակի հիման վրա 1969 թվականին Ռոբեր Բրեսոնի նկարահանած կինոնկարում գլխավոր հերոսուհու դերի կատարումը։ Հաջորդ տարում խաղացել է Զինաիդայի դերը մեկ այլ ռուս գրողի՝ Իվան Տուրգենևի «Առաջին սերը» վիպակի հիման վրա Մաքսիմիլիան Շելլի նկարահանած ֆիլմում։ 1977 թվականին Լիլիանա Կավանին նրան նկարահանել է Նիցշեի մասին իր ստեղծած «Բարուց և չարից անդին» ֆիլմում։ 1988 թվականին Դոմինիկ Սանդան մարմնավորել է Ինեսա Արմանդին Դոմինիկո Դամիանիի «Լենին։ Գնացք» հեռուստաֆիլմում։

Դերասանուհու գեղեցկությունը, ներաշխարհի լեցունությունը, դերասանական վարպետությունը գրավել են աշխարհահռչակ շատ կինոռեժիսորների, որոնք նրան հրավիրել են խաղալու իրենց կինոնկարներում։ Դոմինիկ Սանդան նկարահանվել է համաշխարհային կինոյի այնպիսի գլուխգործոցներում, ինչպիսիք են Բեռնարդո Բերտոլուչիի «Կոնֆորմիստը» (1970 թ.), «Քսաներորդ դար» կինոդյուցազներգությունը (1976 թ.), Լուկինո Վիսկոնտիի «Ընտանեկան դիմանկար՝ ինտերիերում»-ը (1976 թ.), Վիտտորիո դե Սիկայի «Ֆինցի Կոնտինիի այգին» (1970 թ.), Ժակ Դեմիի «Օրվա զարթոնքը» (1979 թ.), «Սենյակ քաղաքում»-ը (1982 թ.), Բենուա Ժակոյի «Աղավնիկի թևիկները» (1979 թ.), «Հոգով ու մարմնով»-ը (1986 թ.), «Նիցշե»-ն (1986 թ.), Մարգերիտ Դյուրասի «Գիշեր-նավը» (1979 թ.), Միշել Դևիլի «Ճամփորդություն երկուսով»-ը (1980 թ.), Լինու Վերտմյուլլերի «Ընդհատակյա տասնյակը» (1988 թ.), «Լուսնյակ գիշերով»-ը (1989 թ.) և բազում այլ ֆիլմեր։ Պոլ Նյումանի հետ Դոմինիկան 1973 թվականին նկարահանվել է Ջոն Հյուսթընի «Մարդ-մակինտոշը» ամերիկյան թրիլլերում։ 1974 թվականին կատարել է Հերմինայի դերը Հերման Հեսսեի «Տափաստանի գայլը» վեպի հիման վրա նկարահանված կինոնկարում։

Դոմինիկ Սանդան 1976 թվականին արժանացել է Կաննի միջազգային կինոփառատոնի «Լավագույն դերասանուհի» մրցանակին՝ Մաուրո Բոլոնյինիի «Ֆերրամոնտիի ժառանգությունը» կինոնկարում բարձրարվեստ դերակատարմամբ հանդես գալու համար[7]։

1977 թվականին կինոռեժիսոր Լուի Մալը հեռուստատեսության համար նկարահանել է դերասանուհու դիմանկար-կինոնկարը՝ «Դոմինիկ Սանդա կամ ուղղորդված երևակայություն» խորագրով։

1993 թվականին դերասանուհին իր ուժերը փորձել է նաև թատրոնում և այդ ժամանակից ի վեր դրամատիկական դերերի կատարմամբ հաջողությամբ հանդես է գալիս թատերական ներկայացումներում ևս։

Ֆրանսիական կինոյի և թատրոնի զարգացման գործում ներդրած գնահատելի ավանդի համար Դոմինկ Սանդան արժանացել է Ֆրանսիայի պետական բարձր պարգևների՝ «Վաստակի համար» և Պատվո լեգեոնի շքանշանների, մեդալների, բարձր կոչումների։

Ներկայումս դերասանուհին ամուսնու՝ փիլիսոփա Նիկոլաե Կուտզարիդայի ապրում է Արգենտինայում։

Ծանոթագրություններ խմբագրել

  1. 1,0 1,1 filmportal.de — 2005.
  2. 2,0 2,1 https://encinematheque.fr/bibli/A2/A215/index.php
  3. 3,0 3,1 https://www.dominiquesanda.com/biographie.php
  4. 4,0 4,1 4,2 Les gens du cinéma
  5. Journal officiel de la République française, Journal officiel de la République française. Document administratif (ֆր.) — 1868. — ISSN 0242-6773
  6. http://www.culture.gouv.fr/Nous-connaitre/Organisation/Conseil-de-l-Ordre-des-Arts-et-des-Lettres/Arretes-de-Nominations-dans-l-ordre-des-Arts-et-des-Lettres/Nomination-dans-l-ordre-des-Arts-et-des-Lettres-juillet-2013
  7. «Festival de Cannes: The Inheritance». festival-cannes.com. Արխիվացված է օրիգինալից 2013 թ․ հունվարի 2-ին. Վերցված է 2009 թ․ մայիսի 8-ին.

Արտաքին հղումներ խմբագրել