Գառնառվույտ (լատ.՝ Oxytropis), բակլազգիների (թիթեռնածաղկավորներ) ընտանիքի բազմամյա խոտաբույսերի կամ կիսաթփիկների ցեղ։ Հայտնի է 150 (այլ տվյալներով՝ 100), ՀՀ-ում՝ 5 տեսակ՝ գառնառվույտ կապույտ լատ.՝ O.cyanea, գառնառվույտ հայկական լատ.՝ O.armeniaca, գառնառվույտ մազմզոտ լատ.՝ Օ.pilosa և այլն։ Հանդիպում է բոլոր մարզերում։ Աճում է քարքարոտ կրային լանջերին, մարգագետիններում, արոտավայրերում։ Գառնառվույտը պատված է գեղձային և պարզ մազիկներով, ցողունի բարձրությունը՝ 5-50 սմ։ Տերևները կենտփետրաձև են։ Ծաղկաբույլը գլխիկավոր կամ երկարավուն ողկույզ է, ծաղիկները՝ կարմրավուն, դեղին, մանուշակագույն։ Ծաղկում է հունիս-օգոստոսին։ Պտուղն ունդ է։
Այս հոդվածի կամ նրա բաժնի որոշակի հատվածի սկզբնական տարբերակը վերցված է Հայաստանի բնաշխարհ հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։ 
|
