Արմեն Բաբախանյան
- Վիքիպեդիայում կան հոդվածներ Բաբախանյան ազգանունով այլ մարդկանց մասին։
Արմեն Վլադիմիրի Բաբախանյան (նոյեմբերի 9, 1967, Երևան, Հայկական ԽՍՀ, ԽՍՀՄ), հայ դաշնակահար, «Կադանս» անսամբլի գեղարվեստական ղեկավար, Երևանի պետական կոնսերվատորիայի դաշնամուրային ֆակուլտետի դեկան[1], Հայաստանի Հանրապետության վաստակավոր արտիստ (2008)։
| Արմեն Բաբախանյան | |
|---|---|
 Մամուլի ասուլիսի ժամանակ (2014 թվականի հոկտեմբերի 9-ին) | |
| Հիմնական տվյալներ | |
| Ծնվել է | նոյեմբերի 9, 1967 (56 տարեկան) Երևան, Հայկական ԽՍՀ, ԽՍՀՄ |
| Երկիր |  ԽՍՀՄ և  Հայաստան |
| Մասնագիտություն | դաշնակահար |
| Գործիքներ | դաշնամուր |
| Աշխատավայր | Երևանի Կոմիտասի անվան պետական կոնսերվատորիա |
| Կրթություն | Երևանի Կոմիտասի անվան պետական կոնսերվատորիա |
| Պարգևներ |  |
 Armen Babakhanyan Վիքիպահեստում | |
Կենսագրություն խմբագրել
Սովորել է Երևանի Կոմիտասի անվան պետական կոնսերվատորիայում (պրոֆեսոր Անահիտ Բոգդանյանի դասարան)։ Հետագայում ուսումը շարունակել է Կլոդ Ֆրենկի և Վերա Գորնոստաևայի ղեկավարությամբ։ 2004 թվականին հիմնել և ղեկավարում է «Կադանս» անսամբլը։
Շրջագայություններ, համերգներ խմբագրել
2004 թվականի ապրիլին անսամբլի հետ կատարել է իր առաջին շրջագայությունը՝ ելույթ ունենալով Բուենոս Այրեսի Teatro Colon դահլիճում։ Մենահամերգներ է ունեցել ԱՄՆ-ում, Կանադայում, Ճապոնիայում, Մեծ Բրիտանիայում, Գերմանիայում, Ավստրիայում, Իտալիայում, Ֆրանսիայում, Իսպանիայում, այլ երկրներում։
Որպես մենակատար հանդես է եկել Բիրմինգհեմյան սիմֆոնիկ նվագախմբի հետ՝ դիրիժոր սըր Սայմոն Ռաթլի ղեկավարությամբ, Թագավորական ֆիլհարմոնիկ, Շոտլանդիայի թագավորական ազգային, Իռլանդիայի ազգային սիմֆոնիկ, ԱՄՆ-ի ազգային սիմֆոնիկ, Դալասի սիմֆոնիկ, Յուտայի սիմֆոնիկ, Իսրայելի ֆիլհարմոնիկ և Սլովենիայի ֆիլհարմոնիկ նվագախմբերի հետ, Յուրի Տեմիրկանովի ղեկավարությամբ Սանկտ Պետերբուրգի ֆիլհարմոնիկ ու Վալերի Գերգիևի գլխավորությամբ Ռուսաստանի ֆիլհարմոնիկ նվագախմբերի հետ։
Մասնակցություն փառատոներին խմբագրել
Մասնակցել է Ասպենի, Ինտերլոխենի, Սանտանդերի և Բաալբեքի երաժշտական փառատոներին։ Իսպանիայում կայացող Սանտանդերի փառատոնում Դմիտրի Շոստակովիչի Դաշնամուրի կվինտետի նրա կատարումն անվանակարգվել է որպես փառատոնի լավագույն կամերային երաժշտություն։
Մրցույթների կազմակերպիչ և ժյուրիի անդամ խմբագրել
Եղել է մի շարք միջազգային դաշնամուրային մրցույթների, այդ թվում՝ Սերգեյ Պրոկոֆևի, Սերգեյ Ռախմանինովի, Գինա Բախաուերի, Մարիա Կալասի անվան դաշնամուրային միջազգային մրցույթների ժյուրիի անդամ։
1999 թվականին Երևանում հիմնել է «Հայաստանի ժառանգություն» դաշնակահարների համահայկական միջազգային մրցույթը և վերջինիս գեղարվեստական ղեկավարն է։
Մանկավարժական գործունեություն խմբագրել
Վարպետության դասեր է անցկացրել Ռուսաստանում, Մեծ Բրիտանիայում, Իսպանիայում, Ճապոնիայում, Չինաստանում, Իսլանդիայում և ԱՄՆ-ում։ 2009-2011 թվականներին մենահամերգներով և համերգներով հանդես է եկել, նաև վարպետության դասեր է անցկացրել Գերմանիայում, Իտալիայում, Սլովենիայում, Շվեյցարիայում, Ֆրանսիայում, Հունաստանում, Իսլանդիայում, Ռուսաստանում, ԱՄՆ-ում, Կանադայում, Չինաստանում և Ճապոնիայում։
Դասավանդում է Երևանի Կոմիտասի անվան պետական կոնսերվատորիայում, որի դաշնամուրային ֆակուլտետի դեկանն է։
Ձայնագրություններ խմբագրել
Ձայնագրություններ է կատարել ASV, Real Sound and Sigmund Classics labels ստուդիաներում։ Նրա ելույթները հեռարձակվել են BBC, PBS (ԱՄՆ), ORF (Ավստրիա) և RAI (Իտալիա) հեռուստատեսություններով։ Պյոտր Չայկովսկու դաշնամուրային սոնատների նրա ձայնագրությունները մեծ արձագանք են ունեցել եվրոպական մամուլում։
Թողարկել է Արամ Խաչատրյանի դաշնամուրային ստեղծագործությունների ամբողջական հավաքածուն, որը 2007 թվականի Ազգային մրցանակաբաշխության ժամանակ ճանաչվել է «Տարվա լավագույն դասական ալբոմ»։
Մրցանակներ, պարգևներ խմբագրել
Մի շարք միջազգային մրցույթների, այդ թվում՝ Լիդսի, Դուբլինի, Վան Քլայբերնի, Ուիլյամ Քափելի, Գինա Բախաուերի անվան և դաշնամուրի համաշխարհային մրցույթների դափնեկիր է։
2008 թվականի մայիսի 26-ին, Հանրապետության տոնի առթիվ, Հայաստանի Հանրապետության նախագահի հրամանագրով Արմեն Բաբախանյանն արժանացել է հանրապետության վաստակավոր արտիստի կոչման[2]։
Ծանոթագրություններ խմբագրել
Արտաքին հղումներ խմբագրել
 | Վիքիպահեստն ունի նյութեր, որոնք վերաբերում են «Արմեն Բաբախանյան» հոդվածին։ |