Արշալույս Անտոնյան
Արշալույս Մեսրոպի Անտոնյան (1921, Մեծամոր, Էջմիածնի գավառ, Հայկական ԽՍՀ), հայ մանկավարժ։ Երկրորդ համաշխարհային պատերազմի Արևելյան ռազմաճակատի («Հայրենական մեծ պատերազմ», 1941-1945) մասնակից։
| Արշալույս Անտոնյան | |
|---|---|
| Ծնվել է | 1921 |
| Ծննդավայր | Մեծամոր, Էջմիածնի գավառ, Հայկական ԽՍՀ |
| Քաղաքացիություն |  ԽՍՀՄ |
| Մասնագիտություն | մանկավարժ |
| Պարգևներ և մրցանակներ |  |
Կենսագրություն խմբագրել
Արշալույս Անտոնյանը ծնվել է 1921 թվականին Հոկտեմբերյանի շրջանի Մեծամոր գյուղում։ Ավարտելով գյուղի միջնակարգ դպրոցը, դասավանդել է հայոց լեզու և գրականություն[1]։
Խորհրդա-գերմանական պատերազմի տարիներին զորակոչվել է բանակ, կռվել է Հայկական 89-րդ հրաձգային դիվիզիայի 531-րդ հրետանային գնդում։ Արշալույսը եղել է գնդի դրոշակակիրը։ Կոմունիստ Անտոնյանը կյանքը վտանգելով պահպանել է գնդի դրոշը։ Չնայած ծանր վերքերին, նա կարողացել է դրոշը հասցնել յուրայիններին։ Խիզախության համար պարգևատրվել է Կարմիր աստղի շքանշանով։ Պատերազմի ավարտից հետո զորացրվել է հայրենի գյուղ[1]։
Պատերազմին հաջորդել են Անտոնյանի ուսումնառության ու մանկավարժական գործունեության տարիները։ Պայքարել է հետ մնացող դպրոցներում աշխատանքները բարելավելու և առաջավորներին հասնելու համար, դասալսումներ, մանկավարժական ընթերցումներ, քննարկումներ, մեթոդական առաջարկություններ, առաջավոր փորձի փոխանակում... այս ամենի հետ նաև հայրենասիրական, ինտերնացիոնալ դաստիարակություն, սահմանապահներին օգնելու աշխատանքներ, «Գիտելիք» ընկերության բաժանմունքի ղեկավարում։ Ղեկավարել է հայոց լեզվի և գրականության մեթոդական միավորումը, օգնել սկսնակ ուսուցիչներին, նրանց փոխանցել իր հարուստ փորձը։ Ղեկավարել է նաև դպրոցի «Բողբոջիկ» գրական խմբակի աշխատանքները[1]։
Արշալույս Անտոնյանը արժանացել է «Ավագ ուսուցիչ» կոչմանը, ստացել է պատվոգրեր, պարգևատրումներ, դիպլոմներ։ Հոկտեմբերյանի շրջանի Մեծամորի № 1 միջնակարգ դպրոցի դահլիճում նշել են Արշալույս Անտոնյանի ծննդյան 60 և մանկավարժական գործունեության 40 տարելիցները[1]։
Պարգևներ խմբագրել
- Կարմիր աստղի շքանշան