Բացել գլխավոր ցանկը
Թոմաս Անդրե Մարի Բուքերո դը Վոլինյին Ավագների խորհրդի անդամի համազգեստով

Ավագների խորհուրդ (ֆր.՝ Conceil des Anciens), ֆրանսիական Վերին պալատը՝ ըստ 3-րդ տարվա սահմանադրության Ավագների խորհուրդը գործել է Դիրեկտորիայի ժամանակներում՝ 1795 թվականի օգոստոսի 22-ից մինչև 1799 թվականի նոյեմբերի 9-ը: Բաղկացած էր 250 անդամներից, որոնք ընտրվում էին դեպարտամենտներում հատուկ այդ նպատակով անցկացվող ընտրողների ժողովներում 40-ից ոչ ցածր տարիք ունեցող, ամուսնացած և առնվազն վերջին 15 տարում Ֆրանսիայում բնակված անձանցից: Ընդ որում՝ խորհրդի կազմը յուրաքանչյուր տարի մեկ երրորդով նորացվում էր:

Ավագների խորհրդի նիստ

Ավագների խորհուրդն իր նիստերն անցկացնում էր Թյուիլրիում, սկզբում՝ Մանեժում, իսկ որոշ ժամանակ անց՝ Բուրբոնյան պալատում: Խորհուրդն ընտրում էր նախագահ և քարտուղար ոչ ավելի, քան մեկ ամիս ժամկետով: Նրանք, ինչպես նաև խորհրդի բոլոր անդամները, աշխատավարձ էին ստանում:

Ավագների խորհուրդը հաստատում կամ մերժում էր 500-ի խորհրդի ներկայացրած որոշումները, ընդ որում՝ անպայմանորեն ամբողջությամբ և առանց ուղղումների: Հավանության արժանացած որոշումները ստանում էին օրենքի կարգավիճակ և ենթակա էին անվերապահ կատարման, իսկ մերժվածները կարող էին վերստին քննարկման ու հաստատման ներկայացվել առնվազն մեկ տարի անց միայն[1]:

Ինքը՝ ավագների խարհուրդը օրենսդրական նախաձեռնությամբ օժտված չէր: Իրավունք ուներ անհրաժեշտության դեպքում փոխելու Օրենսդրական կորպուսի կեցավայրը՝ նախապես նշելով նոր տեղը և կորպուսի հերթական նիստի անցկացման օրն ու ժամը:

Օրենսդրական գործունեության հետ մեկտեղ Ավագների խորհուրդը 500-ի խորհրդի կողմից ներկայացված ցուցակից ընտրում էր հինգ դիրեկտոր, որոնք գործադիր իշխանության գործառույթներ էին համատեղ իրականացնում: Ընտրված հինգ դիրեկտորների և 500-ի խորհրդի անդամների պես՝ Ավագների խորհրդի անդամները ևս կրում էին պաշտոնեական հատուկ համազգեստ ու գլխարկ[2][3]:

Ավագների խորհրդի գործունեությունը դադարեցվել է 1799 թվականին՝ բրյումերի 18-ի հեղաշրջումից հետո:

Օրենսդրական այս մարմնի անվան հիմքում ընկած է Senat բառի ֆրանսերեն թարգմանությունը[4]:

ԾանոթագրություններԽմբագրել

  1. Paul R. Hanson, Contesting the French Revolution, John Wiley & Sons 2009 p.131
  2. http://gallica.bnf.fr/ark:/12148/btv1b6953456x accessed 30/4/2017
  3. https://chrhc.revues.org/4768#tocfrom3n5 accessed 30/4/2017
  4. senate (n.) c. 1200, "legal and administrative body of ancient Rome," from Old French senat or Latin senatus "highest council of the state in ancient Rome," literally "council of elders," from senex (genitive senis) "old man, old" (from PIE root *sen- "old"). Attested from late 14c. in reference to governing bodies of free cities in Europe; of national governing bodies from 1550s; specific sense of upper house of U.S. legislature is recorded from 1775. Online Etymology Dictionary accessed 1/11/2017

ԳրականությունԽմբագրել

Արտաքին հղումներԽմբագրել