Էմմա Հիլլ

Էմմա Հիլլ;
Ծնվել է	1829
Մահացել է	1890
Մասնագիտություն	մոդել
	Emma Madox Brown Վիքիպահեստում

Մաթիլդա «Էմմա» Հիլլ (անգլ.՝ Matilda «Emma» Hill, ամուսնական անունը՝ Էմմա Մեդոքս Բրաուն, անգլ.՝ Emma Madox Brown, 1829 - 1890), պրեռաֆայելիտ նկարիչ Ֆորդ Մեդոքս Բրաունի բնորդուհին և երկրորդ կինը։

Կենսագրություն խմբագրել

Էմմա Հիլլը ծնվել է մոտ 1829 թվականին աղքատ որմնադրի ընտանիքում և չի ստացել այդ ժամանակների համար անգամ նվազագույն կրթությունը։ Մոտ 1848 թվականին Էմման դարձել է բնորդուհի, շուտով նաև՝ նկարիչ Ֆորդ Մեդոքս Բրաունի սիրուհին, որն այդ ժամանակ փոքր դուստր ունեցող այրի տղամարդ էր։ Այդ ժամանակ նա հավանաբար օգտագործել է իր մոր օրիորդական ազգանունը, քանի որ Բրաունն իր օրագրերում հիշատակել է Էմմային Սթոուն ազգանվամբ^[1]։ Զույգի առաջին երեխան՝ դուստր Քեթրինը, ծնվել է 1850 թվականին արտամուսնական ձևով։ Բրաունն ամենայն հավանականությամբ հետաձգել է ամուսնությունը իր ֆինանսական դժվարությունների, ինչպես նաև իր և Էմմայի սոցիալական անհավասարության պատճառով։ Որպեսզի նկարչին արժանի կին լինի, Էմման 1852 թվականին հաճախել է երիտասարդ կանանց համար դպրոց։ 1853 թվականին զույգը պսակադրվել է Լոնդոնի Սուրբ Դունսթանի եկեղեցում։ Հարսանիքի վկաները եղել են նկարչի՝ Պրեռաֆայելիտների եղբայրության երկու ընկերները՝ Դանթե Գաբրիել Ռոսսետտին և Թոմաս Սեդոնը^[2]։

Դատելով օրագրերից, որոնք Բրաունը վարել է ողջ կյանքի ընթացքում, նա և Էմման սիրել են իրար, թեպետ հաճախ են վիճել։ Զույգի երկրորդ երեխան՝ Օլիվեր Մեդոքս Բրաունը, ավելի հայտնի է եղել ընտանեկան Նոլլի (անգլ.՝ Nolly) փաղաքշական անվամբ, ծնվել է 1855 թվականին։ Երիտասարդ տարիքում ընդհանուր վարակումից նրա մահը ծանր ցնցում է եղել ծնողների համար։ Երրորդ զավակը՝ որդի Արթուրը, ծնվել է 1856 թվականին, մահացել է տասը ամսականում։ Այսպիսով, Էմմայի բոլոր երեխաներից ապրել է միայն ավագ դուստր Քեթրինը։

1872 թվականին դստեր հարսանիքին Էմման վարակում է ստացել և մի քանի ամիս ծանր հիվանդացել։ Դա համընկել է Բրաունի ընկերոջ՝ Դանթե Գաբրիել Ռոսսետտիի կյանքի ճգնաժամի և հենց Բրաունի հոդատապի նոպաների հետ^[3]։ Կրտսեր որդու մահից հետո Էմմայի մոտ ալկոհոլի հակում է առաջ եկել։

Էմման մահացել է 1890 թվականին «երկար և ծանր» հիվանդությունից հետո։

Նկարներ խմբագրել

Ուրվանկարներ և դիմանկարներ

Հավանաբար Էմմայի ամենավաղ ուրվանկարն է, որն արել է Բրաունը «Լիր արքայի» համար, 1848
Էմմայի դիմանկարը գլխանոցով, 1852
Էմմայի մատիտով ուրվանկարը, 1853
Էմմայի պաստելով դիմանկարը հիվանդության ժամանակ, 1872