Արտավազդ Գրիգորյան
Արտավազդ Հակոբի Գրիգորյան (1920, Խոտ, Հայաստան - անհայտ), հայ մանկավարժ, Երկրորդ համաշխարհային պատերազմի Արևելյան ռազմաճակատի («Հայրենական մեծ պատերազմ», 1941-1945) մասնակից։
Արտավազդ Գրիգորյան | |
---|---|
Ծնվել է | 1920 |
Ծննդավայր | Խոտ, Հայաստան |
Մահացել է | անհայտ |
Քաղաքացիություն | ԽՍՀՄ |
Կրթություն | Հայկական պետական մանկավարժական համալսարան (1955) |
Մասնագիտություն | մանկավարժ |
Պարգևներ և մրցանակներ |
Կենսագրություն խմբագրել
Արտավազդ Գրիգորյանը ծնվել է 1920 թվականին, Գորիսի շրջանի Խոտ գյուղում։ 1939 թվականին ավարտել է Գորիսի մանկավարժական ուսումնարանը և աշխատել է ուսուցիչ Բարձրավան ու Խոտ գյուղերի դպրոցներում[1]։
Գերմանա-խորհրդային պատերազմի սկզբից Արտավազդը զորակոչվել է բանակ, սովորել հրամանատարական կարճատև դասընթացում և ստացել կրտսեր լեյտենանտի կոչում։ 1942 թվականի նոյեմբերից մասնակցել է Կովկասի պաշտպանությանը Օրջոնիկիձեի ուղղությամբ։ Վիրավորվել է և ապաքինվելուց հետո վերադարձել է զորամաս, որպես վաշտի կոմերիտմիության կազմակերպության քարտուղար Արևմտյան Ուկրաինայի ռազմաճակատից նրան 1943 թվականին ուղարկել են սովորելու ռազմական դպրոցում։ Կարճատև ուսումից հետո նորից մեկնել է մարտի դաշտ[1]։
1944 թվականին Գրիգորյանը նշանակվել է դասակի հրամանատար։ Նրա դասակը ենթարկվել է թշնամու տանկերի հարձակմանը, ծանր դրության մեջ չի նահանջել և շարքից հանել է հինգ տանկ, երեսուն զինվոր և սպա։ Դասակի հրամանատարը ծանր վիրավորվել է և զրկվել ոտքից։ Երկար ժամանակ բուժվել է հոսպիտալներում։ Ցուցաբերած համարձակության ու խիզախության համար Գրիգորյանը պարգևատրվել է Կարմիր աստղի և Փառքի 3-րդ աստիճանի շքանշանով և մի շարք մեդալներով[1]։
1945 թվականի ապրիլին ազատվել է բանակից և վերադարձել հայրենի Խոտ գյուղը։ 10 տարի աշխատել է որպես ուսմասվար։ Մանկավարժական աշխատանքին զուգընթաց 1955 թվականին ավարտել է Երևանի հեռակա մանկավարժական ինստիտուտի լեզվագրական ֆակուլտետը։ 1960 թվականին տեղափոխվել է Գորիս և աշխատանքի անցել նախ՝ Գորիսի մանկավարժական ուսումնարանում, ապա՝ քաղաքի № 3 միջնակարգ դպրոցում դասավանդել է հայոց լեզու և գրականություն։ 1977 թվականի սեպտեմբերից Գրիգորյանը նշանակվել է Գորիսի լուսավորության աշխատողների տան տնօրեն։ Պարգևատրվել է մարտական շքանշաններով և մեդալներով[1]։
Պարգևներ խմբագրել
- Կարմիր աստղի շքանշան
- Փառքի 3-րդ աստիճանի շքանշան