Ագրոկենսաբազմազանություն
Ագրոկենսաբազմազանությունը ներառում է բոլոր այն օրգանիզմները, որոնք ունեն դրական կամ բացասական ազդեցություն ագրոէկոհամակարգերի կենսաբանական արտադրողականության վրա և կիրառվում են սննդամթերքի արտադրությունում[1]։ Ագրոկենսաբազմազանությունը հանդիսանում է կայուն գյուղատնտեսության հիմքը[2]։ Ագրոկենսաբազմազանությունը պարենի և գյուղատնտեսության համար կենսաբանական բազմազանության կարևոր բաղադրիչ է։ Համաձայն կենսաբազմազանության մասին կոնվենցիայի սահմանման՝ «գյուղատնտեսական կենսաբազմազանությունը լայն հասկացություն է, որը ներառում է կենսաբազմազանության՝ սննդին և գյուղատնտեսությանն առնչվող և ագրոէկոհամակարգերի կենսաբազմազանությունը կազմող բոլոր բաղադրիչները. կենդանիների, բույսերի, սնկերի և մանրէների բազմազանություն ու փոփոխականություն՝ գենետիկական, տեսակային և էկոհամակարգային մակարդակներում, որոնք անհրաժեշտ են ագրոէկոհամակարգերի կառուցվածքի, հիմնական ֆունկցիաների և դրանցում ընթացող գործընթացների կայունությունն ապահովելու համար»[3]։
Ագրոկենսաբազմազանությունը դիտարկվում է որպես գենետիկական ռեսուրսների, շրջակա միջավայրի և գյուղատնտեսության միջև փոխազդեցությունների հետևանք։ Այն հազարամյակներ շարունակ համատեղ ընթացող բնական և արհեստական ընտրության արդյունք է։ Ագրոկենսաբազմազանության ձևավորման, դրա պահպանման, ինչպես նաև շրջակա միջավայրի պայմաններին հարմարողականության հիմնական սկզբունքները հասկանալու համար անհրաժեշտ է իմանալ կենսաբազմազանության վրա ազդող ինչպես բնական, այնպես էլ մարդածին գործոնները։
Ագրոկենսաբազմազանությունը և նրա ռեսուրսները համարվում են ցանկացած երկրի տնտեսության և մարդու բնակության միջավայրի հիմնական հենքը[4]։
2016 թվականի մայիսի 26-ին ՀՀ կառավարությունը համաձայնություն է տվել «Ագրոկենսաբազմազանության պահպանման մասին» կոնվենցիայի կնքման առաջարկությանը[5], իսկ նույն թվականի հունիսի 7-ին Բիշքեկում այն ստորագրվել է[6]։
Ծանոթագրություններ խմբագրել
- ↑ Երիցյան Ս.Կ., Գրիգորյան Հ.Է. - «Օրգանական երկրագործության հիմունքներ», էջ 51, Բուհական ուսումնական ձեռնարկ, Արմավ հրատարակչություն, 2019 թ, Երևան, 112 էջ, ISBN 978‐9939‐78‐022‐1:
- ↑ [1] Ագրոկենսաբազմազանություն կրթական ծրագրերի և դասընթացների մշակման մեթոդական ուղեցույց
- ↑ [2] Արխիվացված 2017-11-18 Wayback Machine, Կենսաբանական բազմազանության մասին, Կոնվենցիա
- ↑ [3], Ագրոկենսաբազմազանություն, Ուսումնական ձեռնարկ
- ↑ [4] Արխիվացված 2021-02-26 Wayback Machine ՀՀ Կառավարության որոշում
- ↑ [5] ԱՊՀ երկրների կառավարության ղեկավարների հանդիպում